มจฺฉชาลปกฺขิชาลาทีนิปิ ผลกชาลิกาทีนิ สรปริตฺตาณานิปิ สพฺพานิ อนามาสานิ ฯ ปริโภคตฺถาย ลพฺภมาเนสุ ปน ชาลนฺตาว อาสนสฺส วา เจติยสฺส วา อุปริ พนฺธิสฺสามิ ฉตฺตํ วา เวฐิสฺสามีติ คเหตุํ วฏฺฏติ ฯ สรปริตฺตาณํ สพฺพมฺปิ ภณฺฑมูลตฺถาย สมฺปฏิจฺฉิตุํ วฏฺฏติ ฯ ปรูปโรธนิวารณํ หิ เอตํ น อุปโรธกรนฺติ ฯ ผลกํ ทนฺตกฏฺฐภาชนํ กริสฺสามีติ คเหตุํ วฏฺฏติ ฯ

จมฺมวินทฺธานิ วีณาเภรีอาทีนิ อนามาสานิ ฯ กุรุนฺทิยํ ปน เภรีสงฺฆาโฏปิ วีณาสงฺฆาโฏปิ ตุจฺฉโปกฺขรมฺปิ มุขวฏฺฏิยํ อาโรปิตจมฺมมฺปิ วีณาทณฺฑโกปิ สพฺพํปิ อนามาสนฺติ วุตฺตํ ฯ โอนหิตุํ วา โอนหาเปตุํ วา วาเทตุํ วา วาทาเปตุํ วา น ลพฺภติเยว ฯ เจติยงฺคเณ ปูชํ กตฺวา มนุสฺเสหิ ฉฑฺฑิตํ ทิสฺวาปิ อจาเลตฺวา ว อนฺตรนฺตเร สมฺมชฺชิตพฺพํ ฯ กจวรฉฑฺฑนกาเล ปน กจวรนิยเมเนว หริตฺวา เอกมนฺตํ นิกฺขิปิตุํ วฏฺฏตีติ มหาปจฺจริยํ วุตฺตํ ฯ ภณฺฑมูลตฺถาย สมฺปฏิจฺฉิตุมฺปิ วฏฺฏติ ฯ ปริโภคตฺถาย ลพฺภมาเนสุ ปน วีณาโทณิกญฺจ เภรีโปกฺขรญฺจ ทนฺตกฏฺฐภาชนํ กริสฺสามิ จมฺมํ สตฺถกโกสกนฺติ เอวํ ตสฺส ตสฺส ปริกฺขารสฺส กรณตฺถาย คเหตฺวา ตถา ตถา กาตุํ วฏฺฏติ ฯ

ปุราณทุติยิกาวตฺถุ อุตฺตานตฺถเมว ฯ ยกฺขินีวตฺถุสฺมึ สเจปิ ปรนิมฺมิตวสวตฺติเทวิยา กายสํสคฺคํ สมาปชฺชติ ถุลฺลจฺจยเมว ฯ ปณฺฑกวตฺถุ สุตฺติตฺถีวตฺถุ จ ปากฏเมว ฯ มติตฺถีวตฺถุสฺมึ ปาราชิกปฺปโหนกกาเล ถุลฺลจฺจยํ ตโต ปรํ ทุกฺกฏํ ฯ ติรจฺฉานคตวตฺถุสฺมึ นาคมาณวิกายปิ สุปณฺณมาณวิกายปิ กินฺนริยาปิ คาวิยาปิ ทุกฺกฏเมว ฯ ทารุธิตลิกวตฺถุสฺมึ น เกวลํ ทารุนา เอว อนฺตมโส จิตฺตกมฺมลิขิเตปิ อิตฺถีรูเป ทุกฺกฏเมว ฯ {๒๘๒} สมฺปีฬนวตฺถุ อุตฺตานตฺถเมว ฯ สงฺกมวตฺถุสฺมึ เอกปทิกสงฺกโม วา โหตุ สกฏมคฺคสงฺกโม วา จาเลสฺสามีติ ปโยเค กตมตฺเต จาเลตุ วา มา วา ทุกฺกฏํ ฯ มคฺควตฺถุ ปากฏเมว ฯ รุกฺขวตฺถุสฺมึ รุกฺโข มหนฺโต วา โหตุ มหาชมฺพุปฺปมาโณ ขุทฺทโก วา ตํ จาเลตุํ สกฺโกตุ วา มา วา ปโยคมตฺเตน ทุกฺกฏํ ฯ นาวาวตฺถุสฺมึปิ เอส นโย ฯ รชฺชุวตฺถุสฺมึ ยํ รชฺชุํ อาวิญฺฉนฺโต ฐานา จาเลตุํ สกฺโกติ ตตฺถ ถุลฺลจฺจยํ ฯ ยา มหารชฺชุ โหติ อีสกํปิ ฐานา น จลติ ตตฺถ ทุกฺกฏํ ฯ ทณฺเฑปิ เอเสว นโย ฯ ภูมิยํ ปติตมหารุกฺโขปิ หิ ทณฺฑคฺคหเณเนว อิธ คหิโต ฯ ปตฺตวตฺถุ ปากฏเมว ฯ วนฺทนวตฺถุสฺมึ อิตฺถี ปาเท สมฺพาหิตฺวา วนฺทิตุกามา วาเรตพฺพา ปาทา วา ปฏิจฺฉาเทตพฺพา นิจฺจเลน วา ภวิตพฺพํ ฯ นิจฺจลสฺส หิ จิตฺเตน สาทิยโตปิ อนาปตฺติ ฯ อวสาเน วตฺถุ ปากฏเมว ฯ