มนุสฺสา อุปทฺทุตา ยาจนาย อุปทฺทุตา วิญฺญตฺติยาติ เตสํ ภิกฺขูนํ ตาย ยาจนาย วิญฺญตฺติยา จ ปีฬิตา ฯ อุพฺภิชฺชนฺติปีติ กินฺนุ อาหราเปสฺสนฺตีติ อุพฺเพคํ อิญฺชนํ จลนํ ปฏิลภนฺติ ฯ อุตฺตสนฺติปีติ อหึ วิย ทิสฺวา สหสา อุตฺตสิตฺวา อุกฺกมนฺติ ฯ ปลายนฺติปีติ ทูรโตเยน วา เตน วา ปลายนฺติ ฯ อญฺเญนปิ คจฺฉนฺตีติ ยํ มคฺคํ ปฏิปนฺนา ตํ ปหาย นิวตฺติตฺวา วามํ วา ทกฺขิณํ วา คเหตฺวา คจฺฉนฺติ ฯ ทฺวารํปิ ถเกนฺติ ฯ

{๓๔๔} ภูตปุพฺพํ ภิกฺขเวติ อิติ ภควา เต ภิกฺขู ครหิตฺวา ตทนุรูปญฺจ ธมฺมีกถํ กตฺวา ปุนปิ วิญฺญตฺติยา โทสํ ปากฏํ กุรุมาโน อิมานิ ภูตปุพฺพํ ภิกฺขเวติ อาทินา นเยน ตีณิ วตฺถูนิ ทสฺเสสิ ฯ ตตฺถ มณิกณฺโฐติ โส กิร นาคราชา สพฺพกามททํ มหคฺฆํ มณึ กณฺเฐ ปิลนฺธิตฺวา จรติ ตสฺมา มณิกณฺโฐเตฺวว ปญฺญายิตฺถ ฯ อุปริมุทฺธนิ มหนฺตํ ผณํ กริตฺวา อฏฺฐาสีติ โส กิร เตสํ ทฺวินฺนํ อิสีนํ กนิฏฺโฐ อิสิ เมตฺตาวิหารี อโหสิ ตสฺมา โส นาคราชา นทิโต อุตฺตริตฺวา เทววณฺณํ นิมฺมินิตฺวา ตสฺส สนฺติเก นิสีทิตฺวา สมฺโมทนียํ กถํ กตฺวา ตํ เทววณฺณํ ปหาย สกวณฺณเมว อุปคนฺตฺวา ตํ อิสึ ปริกฺขิปิตฺวา ปสนฺนาการํ กโรนฺโต อุปริมุทฺธนิ มหนฺตํ ผณํ กตฺวา ฉตฺตํ วิย ธารยมาโน มุหุตฺตํ ฐตฺวา ปกฺกมติ ฯ เตน วุตฺตํ อุปริมุทฺธนิ มหนฺตํ ผณํ กริตฺวา อฏฺฐาสีติ ฯ มณิมสฺส กณฺเฐ ปิลนฺธนนฺติ มณึ อสฺส กณฺเฐ ปิลนฺธิตํ อามุตฺตนฺติ อตฺโถ ฯ เอกมนฺตํ อฏฺฐาสีติ เตน เทววณฺเณน อาคนฺตฺวา ตาปเสน สทฺธึ สมฺโมทมาโน เอกสฺมึ ปเทเส อฏฺฐาสิ ฯ มมนฺนปานนฺติ มม อนฺนญฺจ ปานญฺจ ฯ วิปุลนฺติ ปหุตํ ฯ อุฬารนฺติ ปณีตํ ฯ อติยาจโกสีติ อติวิย ยาจโก ฯ ปุนปฺปุนํ ยาจโกสีติ วุตฺตํ โหติ ฯ สุสูติ ตรุโณ ถามสมฺปนฺโน โยพฺพนปฺปตฺตปุริโส ฯ สกฺขราติ วุจฺจติ กาฬสิลา ฯ ตตฺถ โธโต อสิ สกฺขรโธโต นาม วุจฺจติ ฯ สกฺขรโธโต ปาณิมฺหิ อสฺสาติ สกฺขรโธตปาณิ ฯ ปาสาเณ โธตนิสิตขคฺคหตฺโถติ อตฺโถ ฯ ยถา โส อสิหตฺโถ ปุริโส ตาเสยฺย เอวํ ตาเสสิ มํ ฯ เสลํ มํ ยาจมาโนติ มณึ ยาจนฺโตติ อตฺโถ ฯ น ตํ ยาเจติ ตํ น ยาเจยฺย ฯ กตรํ ฯ ยสฺส ปิยํ ชิคึเสติ ยํ อสฺส สตฺตสฺส ปิยนฺติ ชาเนยฺย ฯ กิมงฺคํ ปน มนุสฺสภูตานนฺติ มนุสฺสภูตานํ อมนาปาติ กิเมเวตฺถ วตฺตพฺพํ ฯ