ปญฺโห น ฉิชฺชติ ฯ ราชา สุตฺวา เถเร สนฺนิปาตาเปตฺวา ทีฆการายนํ นาม พฺราหฺมณชาติยํ อมจฺจํ เถรานํ กถํ สุณาหีติ อาณาเปสิ ฯ อมจฺโจ กิร ปณฺฑิโต ภาสนฺตรกุสโล ฯ โส อาห วทนฺตุ ภนฺเต เถรา สุตฺตนฺติ ฯ ตโต อภยคิริตฺเถรา อตฺตโน สุตฺตํ วทึสุ เตนหิ ภิกฺขเว เมตฺติยํ ภิกฺขุนึ สกาย ปฏิญฺญาย นาเสถาติ ฯ อมจฺโจ ภนฺเต ตุมฺหากํ วาเท เถโร การโก โหติ สโทโสติ อาห ฯ มหาวิหารวาสิโนปิ อตฺตโน สุตฺตํ วทึสุ เตนหิ ภิกฺขเว เมตฺติยํ ภิกฺขุนึ นาเสถาติ ฯ อมจฺโจ ภนฺเต ตุมฺหากํ วาเท เถโร อการโก โหติ นิทฺโทโสติ อาห ฯ กิมฺปเนตฺถ ยุตฺตํ ยํ ปจฺฉา วุตฺตํ วิจาริตํ เหตํ อฏฺฐกถาจริเยหิ ฯ ภิกฺขุ ภิกฺขุํ อมูลเกน อนฺติมวตฺถุนา อนุทฺธํเสติ สงฺฆาทิเสโส ภิกฺขุนึ อนุทฺธํเสติ ทุกฺกฏํ ฯ กุรุนฺทิยํ ปน มุสาวาเท ปาจิตฺติยนฺติ วุตฺตํ ฯ ตตฺรายํ วิจารณา ฯ ปุริมนเย ตาว อนุทฺธํสนาธิปฺปายตฺตา ทุกฺกฏเมว ยุชฺชติ ฯ ยถา สติปิ มุสาวาเท ภิกฺขุโน ภิกฺขุสฺมึ สงฺฆาทิเสโส สติปิ จ มุสาวาเท อสุทฺธํ สุทฺธทิฏฺฐิโน อกฺโกสาธิปฺปาเยน วทนฺตสฺส โอมสวาเทเนว ปาจิตฺติยํ น สมฺปชานมุสาวาเทน เอวํ อิธาปิ อนุทฺธํสนาธิปฺปายตฺตา สมฺปชานมุสาวาเท ปาจิตฺติยํ น ยุชฺชติ ทุกฺกฏเมว ยุตฺตํ ฯ ปจฺฉิมนเยปิ มุสาวาทตฺตา ปาจิตฺติยเมว ยุชฺชติ ฯ วจนปฺปมาณโต หิ อนุทฺธํสนาธิปฺปาเยน ภิกฺขุสฺส ภิกฺขุสฺมึ สงฺฆาทิเสโส อกฺโกสาธิปฺปายสฺส มุสาวาเท ภิกฺขุสฺส ภิกฺขุสฺมึ สงฺฆาทิเสโส อกฺโกสาธิปฺปายสฺส จ โอมสวาเท ภิกฺขุสฺส ปน ภิกฺขุนิยา ทุกฺกฏนฺติ วจนํ นตฺถิ สมฺปชานมุสาวาเท ปาจิตฺติยนฺติ วจนมตฺถิ ตสฺมา ปาจิตฺติยเมว ยุชฺชติ ฯ ตตฺร ปน อิทํ อุปปริกฺขิตพฺพํ ฯ อนุทฺธํสนาธิปฺปาเย อสติ ปาจิตฺติยํ ตสฺมึ สติ เกน ภวิตพฺพนฺติ ฯ ตตฺร ยสฺมา มุสา ภณนฺตสฺส ปาจิตฺติเย สิทฺเธปิ อมูลเกน สงฺฆาทิเสเสน อนุทฺธํสเน วิสุํ ปาจิตฺติยํ วุตฺตํ ตสฺมา อนุทฺธํสนาธิปฺปาเย สติ สมฺปชานมุสาวาเท ปาจิตฺติยสฺส โอกาโส น ทิสฺสติ น จ สกฺกา อนุทฺธํเสนฺตสฺส อนาปตฺติยา ภวิตุนฺติ ปุริมนโยเวตฺถ ปริสุทฺธตโร ขายติ ฯ ตถา ภิกฺขุนี ภิกฺขุนึ อมูลเกน อนฺติมวตฺถุนา อนุทฺธํเสติ สงฺฆาทิเสโส ภิกฺขุํ อนุทฺธํเสติ ทุกฺกฏํ ฯ ตตฺร สงฺฆาทิเสโส วุฏฺฐานคามี ทุกฺกฏํ เทสนาคามี เอเตหิ นาสนา นตฺถิ ฯ ยํปิ สา ภควโต ปูรโต ฐตฺวา มุสา อภณิ เตนสฺสา สมฺปชานมุสาวาเท ปาจิตฺติยํ อิมินาปิ นาสนา นตฺถิ ฯ ยสฺมา ปน สา ปกติยาว ทุสฺสีลา ปาปภิกฺขุนี อิทานิ จ สยเมว ทุสฺสีลมฺหีติ วทติ ตสฺมา นํ ภควา อสุทฺธตฺตาเยว นาสาเปสิ ฯ อถโข เมตฺติยภุมฺมชกาติ เอวํ เมตฺติยํ ภิกฺขุนึ นาเสถ อิเม จ ภิกฺขู อนุยุญฺชถาติ วตฺวา อุฏฺฐายาสนา วิหารํ ปวิฏฺเฐ ภควติ เตหิ ภิกฺขูหิ เทถ ทานิ อิมิสฺสา เสตกานีติ นาสิยมานํ ตํ ภิกฺขุนึ ทิสฺวา เต ภิกฺขู ตํ โมเจตุกามตาย อตฺตโน อปราธํ อาวิกรึสุ ฯ เอตมตฺถํ ทสเสตุํ อถโข เมตฺติยภุมฺมชกาติ อาทิ วุตฺตํ ฯ