วินโยติ โจทนา สารณา จ ฯ สตฺถุสาสนนฺติ ญตฺติสมฺปทา จ อนุสฺสาวนสมฺปทา จ ฯ ตสฺมา โจทเกน วตฺถุสฺมึ อาโรปิเต จุทิตโก ปุจฺฉิตพฺโพ สนฺตเมตํ โนติ ฯ เอวํ วตฺถุํ อุปปริกฺขิตฺวา ภูเตน วตฺถุนา โจเทตฺวา สาเรตฺวา ญตฺติสมฺปทาย จ อนุสฺสาวนสมฺปทาย จ ตํ อธิกรณํ วูปสเมตพฺพํ ฯ ตตฺร เจ อลชฺชี ลชฺชึ โจเทติ โส จ อลชฺชี พาโล โหติ อพฺยตฺโต นาสฺส อนุโยโค ทาตพฺโพ ฯ เอวํ ปน วตฺตพฺโพ กิมฺหิ นํ โจเทสีติ ฯ อทฺธา โส วกฺขติ กิมิทํ ภนฺเต กิมฺหินนฺนามาติ ฯ ตฺวํ กิมฺหินมฺปิ น ชานาสิ น ยุตฺตํ ตยา เอวรูเปน พาเลน ปรํ โจเทตุนฺติ อุยฺโยเชตพฺโพ ฯ นาสฺส อนุโยโค ทาตพฺโพ ฯ สเจ ปน โส อลชฺชี ปณฺฑิโต โหติ พฺยตฺโต ทิฏฺเฐน วา สุเตน วา อชฺโฌตฺถริตฺวา สมฺปาเทตุํ สกฺโกติ เอตสฺส อนุโยคํ ทตฺวา ลชฺชิสฺเสว ปฏิญฺญาย กมฺมํ กาตพฺพํ ฯ สเจ ลชฺชี อลชฺชึ โจเทติ โส จ ลชฺชี พาโล โหติ อพฺยตฺโต น สกฺโกติ อนุโยคํ ทาตุํ ตสฺส นโย ทาตพฺโพ กิมฺหิ นํ โจเทสิ สีลวิปตฺติยา วา อาจารวิปตฺติอาทีสุ วา เอกิสฺสาติ ฯ กสฺมา ปน อิมสฺเสว เอวํ นโย ทาตพฺโพ น อิตรสฺสาติ ฯ นนุ น ยุตฺตํ วินยธรานํ อคติคมนนฺติ ฯ น ยุตฺตเมว ฯ อิทํ ปน อคติคมนํ น โหติ ฯ ธมฺมานุคฺคโห นาม เอโส ฯ อลชฺชินิคฺคหตฺถาย หิ ลชฺชิปคฺคหตฺถาย จ สิกฺขาปทํ ปญฺญตฺตํ ฯ ตตฺร อลชฺชี นยํ ลภิตฺวา อชฺโฌตฺถรนฺโต เอหีติ ฯ ลชฺชี ปน นยํ ลภิตฺวา ทิฏฺเฐ ทิฏฺฐสนฺตาเนน สุเต สุตสนฺตาเนน ปติฏฺฐาย กเถสฺสติ ฯ ตสฺมา ตสฺส ธมฺมานุคฺคโห วฏฺฏติ ฯ สเจ ปน โส ลชฺชี ปณฺฑิโต โหติ พฺยตฺโต ปติฏฺฐาย กเถติ อลชฺชี จ เอตมฺปิ นตฺถิ เอตมฺปิ นตฺถีติ ปฏิญฺญํ น เทติ อลชฺชิสฺส ปฏิญฺญายเอว กาตพฺพํ ฯ ตทตฺถทีปนตฺถญฺจ อิทํ วตฺถุ เวทิตพฺพํ ฯ เตปิฏกจูฬาภยตฺเถโร กิร โลหปาสาทสฺส เหฏฺฐา ภิกฺขูนํ วินยํ กเถตฺวา สายณฺหสมเย วุฏฺฐาติ ฯ ตสฺส วุฏฺฐานสมเย เทฺว อตฺถปจฺจตฺถิกา กถํ ปวตฺเตสุํ ฯ เอโก เอตมฺปิ นตฺถิ เอตมฺปิ นตฺถีติ ปฏิญฺญํ น เทติ ฯ อถ อปฺปาวเสเส ปฐมยาเม เถรสฺส ตสฺมึ ปุคฺคเล อยํ ปติฏฺฐาย กเถติ อยํ ปน ปฏิญฺญํ น เทติ พหูนิ จ วตฺถูนิ โอสฏานิ อทฺธา เอตํ กตํ ภวิสฺสตีติ อสุทฺธลทฺธิ อุปฺปนฺนา ฯ ตโต วิชนีทณฺฑเกน ปาทกฏฺฐลิกาย สญฺญํ ทตฺวา อหํ อาวุโส วินิจฺฉินิตุํ อนนุจฺฉวิโก อญฺเญน วินิจฺฉินาเปหีติ อาห ฯ กสฺมา ภนฺเตติ ฯ เถโร ตมตฺถํ อาโรเจสิ ฯ จุทิตปุคฺคลสฺส กาเย ทาโห อุฏฺฐิโต ฯ ตโต เถรํ วนฺทิตฺวา วินิจฺฉินิตุํ อนุรูเปน วินยธเรน นาม ตุมฺหาทิเสเนว ภวิตุํ วฏฺฏติ โจทเกน จ อีทิเสเนว ภวิตุํ วฏฺฏตีติ วตฺวา เสตกานิ นิวาเสตฺวา จิรํ กิลมิตตฺถ มยาติ ขมาเปตฺวา ปกฺกามิ ฯ เอวํ ลชฺชินา โจทิยมาโน อลชฺชี พหูสุปิ วตฺถูสุ อุปฺปนฺเนสุ ปฏิญฺญํ น เทติ ฯ โส เนว สุทฺโธติ วตฺตพฺโพ น อสุทฺโธติ ฯ ชีวมตโก นาม อามกปูติโก นาเมโส ฯ สเจ ปนสฺส อญฺญมฺปิ ตาทิสํ วตฺถุ อุปฺปชฺชติ น วินิจฺฉินิตพฺพํ ฯ ตถานาสิตโกว ภวิสฺสติ ฯ สเจ ปน อลชฺชีเยว อลชฺชึ โจเทติ โส วตฺตพฺโพ อาวุโส ตว วจเนนายํ กึ สกฺกา วตฺตุนฺติ ฯ อิตรมฺปิ ตเถว วตฺวา อุโภ เอกสมฺโภคปริโภคา หุตฺวา ชีวถาติ อุยฺโยเชตพฺพา ฯ สีลตฺถาย เตสํ วินิจฺฉโย น กาตพฺโพ ฯ ปตฺตจีวรปริเวณาทิอตฺถาย ปน ปฏิรูปํ สกฺขึ ลภิตฺวา กาตพฺโพ ฯ อถ ลชฺชีเยว ลชฺชึ โจเทติ วิวาโท จ เนสํ กิสฺมิญฺจิเทว อปฺปมตฺตโก โหติ สญฺญาเปตฺวา มา เอวํ กโรถาติ อจฺจยํ เทสาเปตฺวา อุยฺโยเชตพฺพา ฯ อถ ปเนตฺถ จุทิตเกน สหสา วิรทฺธํ โหติ อาทิโต ปฏฺฐาย อลชฺชี นาม นตฺถิ ฯ โส จ ปกฺขานุรกฺขณตฺถาย ปฏิญฺญํ น เทติ ฯ มยํ สทฺทหาม มยํ สทฺทหามาติ พหู อุฏฺฐหนฺติ ฯ โส เตสํ ปฏิญฺญาย เอกวารํ เทฺววารํ สุทฺโธ โหตุ ฯ อถ ปน วิรทฺธกาลโต ปฏฺฐาย ฐาเน น ติฏฺฐติ ฯ วินิจฺฉโย ทาตพฺโพ ฯ