ติสฺโส โมคฺคลิปุตฺโต จ ปญฺเจเต วิชิตาวิโน

ปรมฺปราย วินยํ ทีเป ชมฺพุสิริวฺหเย

อจฺฉิชฺชมานํ อาเนสุํ ตติโย ยาว สงฺคโห ฯ

อายสฺมา หิ อุปาลิ อิมํ วินยวํสํ วินยตนฺตึ วินยปฺปเวณึ ภควโต สมฺมุขา อุคฺคเหตฺวา พหูนํ หทเย ปติฏฺฐาเปสิ ฯ ตสฺส หายสฺมโต สนฺติเก วินยวํสํ อุคฺคเหตฺวา วินเย ปกตญฺญุตํ ปตฺเตสุ ปุคฺคเลสุ ปุถุชฺชนโสตาปนฺนสกทาคามิอนาคามิโน คณนปถํ วีติวตฺตา ฯ ขีณาสวานํ สหสฺสเมกํ อโหสิ ฯ ทาสกตฺเถโรปิ ตสฺเสว สทฺธิวิหาริโก อโหสิ ฯ โส อุปาลิตฺเถรสฺส สมฺมุขา อุคฺคเหตฺวา ตเถว วินยํ วาเจสิ ฯ ตสฺสาปิ อายสฺมโต สนฺติเก อุคฺคเหตฺวา วินเย ปกตญฺญุตํ ปตฺตา ปุถุชฺชนาทโย คณนปถํ วีติวตฺตา ฯ ขีณาสวานํ สหสฺสเมกํ อโหสิ ฯ โสณกตฺเถโร ปน ทาสกตฺเถรสฺส สทฺธิวิหาริโก อโหสิ ฯ โสปิ อตฺตโน อุปชฺฌายสฺส ทาสกตฺเถรสฺส สมฺมุขา อุคฺคเหตฺวา ตเถว วินยํ วาเจสิ ฯ ตสฺสาปิ อายสฺมโต สนฺติเก อุคฺคเหตฺวา วินเย ปกตญฺญุตํ ปตฺตา ปุถุชฺชนาทโย คณนปถํ วีติวตฺตา ฯ ขีณาสวานํ สหสฺสเมว อโหสิ ฯ สิคฺควตฺเถโรปิ โสณกตฺเถรสฺส สทฺธิวิหาริโก เถรสฺส สนฺติเก วินยํ อุคฺคเหตฺวา อรหนฺตสหสฺสสฺส ธุรคฺคาโห อโหสิ ฯ ตสฺส ปนายสฺมโต สนฺติเก อุคฺคเหตฺวา วินเย ปกตญฺญุตํ ปตฺตา ปุถุชฺชนโสตาปนฺนสกทาคามิอนาคามิโนปิ ขีณาสวาปิ เอตฺตกานิ สตานีติ วา เอตฺตกานิ สหสฺสานีติ วา อปริจฺฉินฺนา อเหสุํ ฯ ตทา กิร ชมฺพุทีเป อติมหาภิกฺขุสมุทโย อโหสิ ฯ โมคฺคลีปุตฺตติสฺสตฺเถรสฺส อานุภาโว ตติยสงฺคีติยํ ปากโฏ ภวิสฺสติ ฯ เอวมิทํ วินยปิฏกํ ชมฺพุทีเป ตาว อิมาย อาจริยปรมฺปราย ยาว ตติยสงฺคีติ ตาว อาภฏนฺติ เวทิตพฺพํ ฯ