อยํ หิสฺส ธุตงฺคเสวนา กมฺมฏฺฐานภาวนา จ อายตึ มคฺคผลานํ อุปนิสฺสโย ภวิสฺสติ ฯ สทฺธิวิหาริกาทโยปิสฺส อนุสิกฺขมานา อรญฺเญ วิหาตพฺพํ มญฺญิสฺสนฺตีติ ฯ เอวํ ยฺวายํ ทุพฺพโล โหติ อปฺปตฺถาโม คามนฺเตเยว วิหรนฺโต สกฺโกติ ทุกฺขสฺสนฺตํ กาตุํ น อรญฺเญ อิมํ ปุคฺคลํ สนฺธาย ภควา โย อิจฺฉติ คามนฺเต วิหรตูติ อาห ฯ อิมินา จ ปุคฺคเลน อญฺเญสมฺปิ ทฺวารํ ทินฺนํ ฯ ยทิ ปน ภควา เทวทตฺตสฺส วาทํ สมฺปฏิจฺเฉยฺย ยฺวายํ ปุคฺคโล ปกติยา ทุพฺพโล โหติ อปฺปตฺถาโม โยปิ ทหรกาเล อรญฺญวาสํ อภิสมฺภุณิตฺวา ชิณฺณกาเล วา วาตปิตฺตาทีหิ สมุปฺปนฺนธาตุกฺโขภกาเล วา นาภิสมฺภุณาติ คามนฺเตเยว ปน วิหรนฺโต สกฺโกติ ทุกฺขสฺสนฺตํ กาตุํ เตสํ อริยมคฺคูปจฺเฉโท ภเวยฺย อรหตฺตผลาธิคโม น ภเวยฺย อุทฺธมฺมํ อุพฺพินยํ วิโลมํ อนิยฺยานิกํ สตฺถุสาสนํ ภเวยฺย สตฺถา จ เตสํ อสพฺพญฺญู อสฺส สกวาทํ ฉฑฺเฑตฺวา เทวทตฺตสฺส วาเท ปติฏฺฐิโตติ คารยฺโห จ ภเวยฺย ฯ ตสฺมา ภควา เอวรูเป ปุคฺคเล สงฺคณฺหนฺโต เทวทตฺตสฺส วาทํ ปฏิกฺขิปิ ฯ เอเตเนว อุปาเยน ปิณฺฑปาติกวตฺถุสฺมิมฺปิ ปํสุกูลิกวตฺถุสฺมิมฺปิ อฏฺฐมาเส รุกฺขมูลิกวตฺถุสฺมิมฺปิ วินิจฺฉโย เวทิตพฺโพ ฯ จตฺตาโร ปน มาเส รุกฺขมูลเสนาสนํ ปฏิกฺขิตฺตเมว ฯ

มจฺฉมํสวตถุสฺมึ ติโกฏิปริสุทฺธนฺติ ตีหิ โกฏีหิ ปริสุทฺธํ ทิฏฺฐาทีหิ อปริสุทฺธีหิ วิรหิตนฺติ อตฺโถ ฯ เตเนวาห อทิฏฺฐํ อสฺสุตํ อปริสงฺกิตนฺติ ฯ ตตฺถ อทิฏฺฐนฺนาม ภิกฺขูนํ อตฺถาย มิคมจฺเฉ วธิตฺวา คยฺหมานํ อทิฏฺฐํ ฯ อสฺสุตนฺนาม ภิกฺขูนํ อตฺถาย มิคมจฺเฉ วธิตฺวา คหิตนฺติ อสฺสุตํ ฯ อปริสงฺกิตํ ปน ทิฏฺฐปริสงฺกิตํ สุตปริสงฺกิตํ ตทุภยวินิมุตฺตปริสงฺกิตญฺจ ญตฺวา ตพฺพิปกฺขโต ชานิตพฺพํ ฯ กถํ ฯ อิธ ภิกฺขู ปสฺสนฺติ มนุสฺเส ชาลวาคุราทิหตฺเถ คามโต วา นิกฺขมนฺเต อรญฺเญ วา วิจรนฺเต ฯ ทุติยทิวเส จ เนสํ ตํ คามํ ปิณฺฑาย ปวิฏฺฐานํ สมจฺฉมํสํ ปิณฺฑปาตํ อภิหรนฺติ ฯ เต เตน ทิฏเฐน ปริสงฺกนฺติ ภิกขูนํ นุโข อตฺถาย กตนฺติ ฯ อิทํ ทิฏฺฐปริสงฺกิตนฺนาม ฯ เอตํ คเหตุํ น วฏฺฏติ ฯ ยํ เอวํ อปริสงฺกิตํ ตํ วฏฺฏติ ฯ สเจ ปน เต มนุสฺสา กสฺมา ภนฺเต น คณฺหาถาติ ปุจฺฉิตฺวา ตมตฺถํ สุตฺวา นยิทํ ภนฺเต ภิกฺขูนํ อตฺถาย กตํ อมฺเหหิ อตฺตโน อตฺถาย วา ราชายุตฺตาทีนํ อตฺถาย วา กตนฺติ วทนฺติ กปฺปติ ฯ นเหว โข ภิกฺขู ปสฺสนฺติ อปิจ สุณนฺติ มนุสฺสา กิร ชาลวาคุราทิหตฺถา คามโต วา นิกฺขมนฺติ อรญฺเญ วา วิจรนฺตีติ ฯ ทุติยทิวเส จ เตสํ ตํ คามํ ปิณฺฑาย ปวิฏฺฐานํ สมจฺฉมํสํ ปิณฺฑปาตํ อภิหรนฺติ ฯ เต เตน สุเตน ปริสงฺกนฺติ ภิกฺขูนํ นุโข อตฺถาย กตนฺติ ฯ อิทํ สุตปริสงฺกิตนฺนาม ฯ เอตํ คเหตุํ น วฏฺฏติ ฯ ยํ เอวํ อปริสงฺกิตํ ตํ วฏฺฏติ ฯ สเจ ปน เต มนุสฺสา กสฺมา ภนฺเต น คณฺหาถาติ ปุจฺฉิตฺวา ตมตฺถํ สุตฺวา นยิทํ ภิกฺขูนํ อตฺถาย กตํ อมฺเหหิ อตฺตโน อตฺถาย วา ราชายุตฺตาทีนํ อตฺถาย วา กตนฺติ วทนฺติ กปฺปติ ฯ นเหว โข ปน ปสฺสนฺติ น สุณนฺติ อปิจ เตสํ ตํ คามํ ปิณฺฑาย ปวิฏฺฐานํ ปตฺตํ คเหตฺวา สมจฺฉมํสํ ปิณฺฑปาตํ อภิสงฺขริตฺวา อภิหรนฺติ ฯ เต ปริสงฺกนฺติ ภิกฺขูนํ นุโข อตฺถาย กตนฺติ ฯ อิทํ ตทุภยวินิมุตฺตปริสงฺกิตนฺนาม ฯ เอตมฺปิ คเหตุํ น วฏฺฏติ ฯ ยํ เอวํ อปริสงฺกิตํ ตํ วฏฺฏติ ฯ สเจ ปน เต มนุสฺสา กสฺมา ภนฺเต น คณฺหาถาติ ปุจฺฉิตฺวา ตมตฺถํ สุตฺวา นยิทํ ภนฺเต ภิกฺขูนํ อตฺถาย กตํ อมฺเหหิ อตฺตโน อตฺถาย วา ราชายุตฺตาทีนํ อตฺถาย วา กตํ ปวตฺตมํสํ วา กปฺปิยเมว ลภิตฺวา ภิกฺขูนํ อตฺถาย สมฺปาทิตนฺติ วทนฺติ กปฺปติ ฯ มตานํ เปตกิจฺจตฺถาย มงฺคลาทีนํ วา อตฺถาย กเตปิ เอเสว นโย ฯ ยํ ยํ หิ ภิกฺขูนํเยว อตฺถาย อกตํ ยตฺถ จ นิพฺเพมติโก โหติ ตํ สพฺพํ กปฺปติ ฯ สเจ ปน เอกสฺมึ วิหาเร ภิกฺขูนํ อุทฺทิสฺส กตํ โหติ เต จ อตฺตโน อตฺถาย กตภาวํ น ชานนฺติ อญฺเญ ชานนฺติ เย ชานนฺติ เตสํ น วฏฺฏติ ฯ อญฺเญ น ชานนฺติ เตเยว ชานนฺติ เตสํเยว น วฏฺฏติ อญฺเญสํ วฏฺฏติ ฯ เตปิ อมฺหากํ อตฺถาย กตนฺติ ชานนฺติ อญฺเญปิ เอเตสํ อตฺถาย กตนฺติ ชานนฺติ สพฺเพสํปิ น วฏฺฏติ ฯ สพฺเพ น ชานนฺติ สพฺเพสํ วฏฺฏติ ฯ ปญฺจสุปิ สหธมฺมิเกสุ ยสฺส วา ตสฺส วา อตฺถาย อุทฺทิสฺส กตํ สพฺเพสํ น กปฺปติ ฯ สเจ ปน โกจิ เอกํ ภิกฺขุํ อุทฺทิสฺส ปาณํ วธิตฺวา ตสฺส ปตฺตํ ปูเรตวา เทติ โส จ อตฺตโน อตฺถาย กตภาวํ ชานํเยว คเหตฺวา อญฺญสฺส ภิกฺขุโน เทติ โส ตสฺส สทฺธาย ปริภุญฺชติ กสฺส อาปตฺตีติ ฯ ทฺวินฺนํปิ อนาปตฺติ ฯ ยํ หิ อุทฺทิสฺส กตํ ตสฺส อภุตฺตตาย อนาปตฺติ อิตรสฺส อชานนตาย จ ฯ กปฺปิยมํสสฺส หิ ปฏิคฺคหเณ อาปตฺติ นตฺถิ ฯ อุทฺทิสฺส กตญฺจ อชานิตฺวา ภุญฺชนฺตสฺส ปจฺฉา ญตฺวา อาปตฺติเทสนากิจฺจํ นาม นตฺถิ ฯ อกปฺปิยมํสํ ปน อชานิตฺวา ภุตฺเตน ปจฺฉา ญตฺวาปิ อาปตฺติ เทเสตพฺพา ฯ อุทฺทิสฺส กตํ หิ ญตฺวา ภุญฺชโต จ อาปตฺติ ฯ อกปฺปิยมํสํ อชานิตฺวา ภุญฺชนฺตสฺสาปิ อาปตฺติเยว ฯ ตสฺมา อาปตฺติภีรุเกน รูปํ สลฺลกฺเขนฺเตนาปิ ปุจฺฉิตฺวาว มํสํ ปฏิคฺคเหตพฺพํ ฯ ปริโภคกาเล ปุจฺฉิตฺวา ปริภุญฺชิสฺสามีติ คเหตฺวา ปุจฺฉิตฺวาว ปริภุญฺชิตพฺพํ ฯ กสฺมา ฯ ทุวิญฺเญยฺยตฺตา ฯ อจฺฉมํสํ หิ สูกรมํสสทิสํ โหติ ฯ ทีปิมํสาทีนิ มิคมํสาทิสทิสานิ ฯ ตสฺมา ปุจฺฉิตฺวา คหณเมว วตฺตนฺติ วทนฺติ ฯ