{๔๑๗-๔๑๘} เตน สมเยน พุทฺโธ ภควาติ ทุติยสงฺฆเภทสิกฺขาปทํ ฯ ตตฺถ อนุวตฺตกาติ ตสฺส ทิฏฺฐิขนฺติรุจิคฺคหเณน อนุปฏิปชฺชนกา ฯ วคฺคํ อสามคฺคีปกฺขิยวจนํ วทนฺตีติ วคฺควาทกา ฯ ปทภาชเน ปน ตสฺส วณฺณนาย ปกฺขาย ฐิตา โหนฺตีติ วุตฺตํ ฯ ตสฺส สงฺฆเภทาย ปรกฺกมนฺตสฺส วณฺณนตฺถาย จ ปกฺขวุฑฺฒิอตฺถาย จ ฐิตาติ อตฺโถ ฯ เยหิ วคฺควาทกา เต นิยเมน อีทิสา โหนฺติ ตสฺมา เอตํ วุตฺตํ ฯ ยสฺมา ปน ติณฺณํ อุทฺธํ กมฺมารหา น โหนฺติ น หิ สงฺโฆ สงฺฆสฺส กมฺมํ กโรติ ตสฺมา เอโก วา เทฺว วา ตโย วาติ วุตฺตํ ฯ ชานาติ โนติ อมฺหากํ ฉนฺทาทีนิปิ ชานาติ ฯ ภาสตีติ เอวํ กโรมาติ อมฺเหหิ สทฺธึ ภาสติ ฯ อมฺหากํเปตํ ขมตีติ ยํ โส กโรติ เอตํ อมฺหากํปิ รุจฺจติ ฯ สเมตายสฺมนฺตานํ สงฺเฆนาติ อายสฺมนฺตานํ จิตฺตํ สงฺเฆน สทฺธึ สเมตุ สมาคจฺฉตุ เอกีภาวํ ยาตูติ วุตฺตํ โหติ ฯ เสสเมตฺถ ปฐมสิกฺขาปเท วุตฺตนยตฺตา อุตฺตานตฺถตฺตา จ ปากฏเมว ฯ สมุฏฺฐานาทีนิปิ ปฐมสิกฺขาปทสทิสาเนวาติ ฯ

ทุติยสงฺฆเภทสิกฺขาปทวณฺณนา นิฏฺฐิตา ฯ