ปาปา สมาจารา อสฺสาติ ปาปสมาจาโร ฯ เต ปน ยสฺมา มาลาวจฺฉโรปนาทโย อิธ อธิปฺเปตา ตสฺมา มาลาวจฺฉํ โรเปติปีติ อาทินา นเยนสฺส ปทภาชนํ วุตฺตํ ฯ ติโรกฺขาติ ปรมฺมุขา ฯ กุลานิ จ เตน ทุฏฺฐานีติ เอตฺถ ปน ยสฺมา กุลานีติ โวหารมตฺตเมตํ อตฺถโต หิ มนุสฺสา เตน ทุฏฺฐา โหนฺติ ตสฺมาสฺส ปทภาชเน ปุพฺเพ สทฺธา หุตฺวาติ อาทิมาห ฯ ฉนฺทคามิโนติ ฉนฺเทน คจฺฉนฺตีติ ฉนฺทคามิโน ฯ เอส นโย เสเสสุ ฯ สมนุภาสิตพฺโพ ตสฺส ปฏินิสฺสคฺคายาติ เอตฺถ กุลทูสกกมฺเมน ทุกฺกฏเมว ฯ ยํ ปน โส สงฺฆํ ปริหริตฺวา ฉนฺทคามิโนติ อาทิมาห ตสฺส ปฏินิสฺสคฺคาย สมนุภาสนกมฺมํ กาตพฺพนฺติ เอวมตฺโถ ทฏฺฐพฺโพ ฯ เสสํ สพฺพตฺถ อุตฺตานตฺถเมว ฯ สมุฏฺฐานาทีนิปิ ปฐมสงฺฆเภทสทิสาเนวาติ ฯ

กุลทูสกสิกฺขาปทวณฺณนา นิฏฺฐิตา ฯ