อถ ราชา สญฺชาตเปโม สมฺพหุมาโน เอตํ สามเณรํ ปกฺโกสถาติ อมจฺเจ เปเสสิ ฯ เต อติจิรายนฺตีติ ปุน เทฺว ตโย เปเสสิ ตุริตํ อาคจฺฉตูติ ฯ สามเณโร อตฺตโน ปกติยาเอว อคมาสิ ฯ ราชา ปฏิรูปมาสนํ ญตฺวา นิสีทถาติ อาห ฯ โส อิโตจิโตจ วิโลเกตฺวา นตฺถิทานิ อญฺเญ ภิกฺขูติ สมุสฺสิตเสตจฺฉตฺตํ ราชปลฺลงฺกํ อุปสงฺกมิตฺวา ปตฺตคฺคหณตฺถาย รญฺโญ อาการํ ทสฺเสสิ ฯ ราชา ตํ ปลฺลงฺกสมีปํ อุปคจฺฉนฺตํเยว ทิสฺวา จินฺเตสิ อชฺเชว ทานิ อยํ สามเณโร อิมสฺส เคหสฺส สามิโก ภวิสฺสตีติ ฯ สามเณโร รญฺโญ หตฺเถ ปตฺตํ ทตฺวา ปลฺลงฺกํ อภิรุหิตฺวา นิสีทิ ฯ ราชา อตฺตโน อตฺถาย สมฺปาทิตํ สพฺพํ ยาคุขชฺชกภตฺตวิกตึ อุปนาเมสิ ฯ สามเณโร อตฺตโน ยาปนียมตฺตกเมว สมฺปฏิจฺฉิ ฯ ภตฺตกิจฺจาวสาเน ราชา อาห สตฺถารา ตุมฺหากํ ทินฺนํ โอวาทํ ชานาถาติ ฯ ชานามิ มหาราช เอกเทเสนาติ ฯ ตาต มยฺหมฺปิ นํ กเถหีติ ฯ สาธุ มหาราชาติ รญฺโญ อนุรูปํ ธมฺมปเท อปฺปมาทวคฺคํ อนุโมทนตฺถาย อภาสิ ฯ ราชา

อปฺปมาโท อมตํ ปทํ ปมาโท มจฺจุโน ปทนฺติ สุตฺวาว อญฺญาตํ ตาต ปริโยสาเปหีติ อาห ฯ อนุโมทนาวสาเน จ อฏฺฐ เต ตาต ธุวภตฺตานิ ทมฺมีติ อาห ฯ สามเณโร อาห เอตานิ อหํ อุปชฺฌายสฺส ทมฺมิ มหาราชาติ ฯ โก อยํ ตาต อุปชฺฌาโย นามาติ ฯ วชฺชาวชฺชํ ทิสฺวา โจเทตา สาเรตา จ มหาราชาติ ฯ อญฺญานิปิ เต ตาต อฏฺฐ ทมฺมีติ ฯ เอตานิ อาจริยสฺส ทมฺมิ มหาราชาติ ฯ โก อยํ ตาต อาจริโย นามาติ ฯ อิมสฺมึ สาสเน สิกฺขิตพฺพธมฺเมสุ ปติฏฺฐาเปตา มหาราชาติ ฯ สาธุ ตาต อญฺญานิปิ เต อฏฺฐ ทมฺมีติ ฯ เอตานิ ภิกฺขุสงฺฆสฺส ทมฺมิ มหาราชาติ ฯ โก อยํ ตาต ภิกฺขุสงฺโฆ นามาติ ฯ ยํ นิสฺสาย มหาราช อมฺหากํ อาจริยูปชฺฌายานญฺจ มมญฺจ ปพฺพชฺชา จ อุปสมฺปทา จาติ ฯ ราชา ภิยฺโยโส มตฺตาย ตุฏฺฐจิตฺโต อาห อญฺญานิปิ เต ตาต อฏฺฐ ทมฺมีติ ฯ สามเณโร สาธูติ สมฺปฏิจฺฉิตฺวา ปุนทิวเส ทฺวตฺตึส ภิกฺขู คเหตฺวา ราชนฺเตปุรํ ปวิสิตฺวา ภตฺตกิจฺจํ อกาสิ ฯ ราชา อญฺเญปิ ทฺวตฺตึส ภิกฺขู ตุมฺเหหิ สทฺธึ เสฺว ภิกฺขํ คณฺหนฺตูติ เอเตเนว อุปาเยน ทิวเส ทิวเส วฑฺฒาเปนฺโต สฏฺฐิสหสฺสานํ พฺราหฺมณปริพฺพาชกาทีนํ ภตฺตํ อุปจฺฉินฺทิตฺวา อนฺโตนิเวสเน สฏฺฐิสหสฺสานํ ภิกฺขูนํ นิจฺจภตฺตํ ปฏฺฐเปสิ นิโคฺรธตฺเถรคเตเนว ปสาเทน ฯ นิโคฺรธตฺเถโรปิ ราชานํ สปริสํ ตีสุ สรเณสุ ปญฺจสุ จ สีเลสุ ปติฏฺฐาเปตฺวา พุทฺธสาสเน โปถุชฺชนิเกน ปสาเทน อจลปฺปสาทํ กตฺวา ปติฏฺฐาเปสิ ฯ ปุน ราชา อโสการามํ นาม มหาวิหารํ การาเปตฺวา สฏฺฐิสหสฺสานํ ภิกฺขูนํ ภตฺตํ ปฏฺฐเปสิ ฯ สกลชมฺพุทีเป จ จตุราสีติยา นครสหสฺเสสุ จตุราสีติ วิหารสหสฺสานิ การาเปสิ จตุราสีติสหสฺสเจติยปฏิมณฺฑิตานิ ธมฺเมเนว โน อธมฺเมน ฯ