รญฺโญ ปน อฏฺฐวสฺสาภิเสกกาเลเยว โกนฺตปุตฺตติสฺสตฺเถโร พฺยาธิปฏิกมฺมตฺถํ ภิกฺขาจารวตฺเตน อาหิณฺฑิตฺวา ปสตมตฺตํ สปฺปี อลภิตฺวา พฺยาธิพเลน ปริกฺขีณายุสงฺขาโร ภิกฺขุสงฺฆํ อปฺปมาเทน โอวทิตฺวา อากาเส ปลฺลงฺเกน นิสีทิตฺวา เตโชธาตุํ สมาปชฺชิตฺวา

ปรินิพฺพายิ ฯ ราชา ตํ ปวุตฺตึ สุตฺวา เถรสฺส สกฺการํ กตฺวา มยิ นาม รชฺชํ กาเรนฺเต เอวํ ภิกฺขูนํ ปจฺจยา ทุลฺลภาติ นครสฺส จตูสุ ทฺวาเรสุ โปกฺขรณิโย กาเรตฺวา เภสชฺชสฺส ปูราเปตฺวา ทาเปสิ ฯ เตน กิร สมเยน ปาฏลิปุตฺตสฺส จตูสุ ทฺวาเรสุ จตฺตาริ สตสหสฺสานิ สภายํ สตสหสฺสนฺติ ทิวเส ทิวเส ปญฺจ สตสหสฺสานิ รญฺโญ อุปฺปชฺชนฺติ ฯ ตโต ราชา นิโคฺรธตฺเถรสฺส เทวสิกํ สตสหสฺสํ วิสชฺเชสิ ฯ พุทฺธสฺส เจติเย คนฺธมาลาทีหิ ปูชนตฺถาย สตสหสฺสํ ธมฺมสฺส สตสหสฺสํ ฯ ตํ ธมฺมธรานํ พหุสฺสุตานํ จตุปฺปจฺจยตฺถาย อุปนียติ ฯ สงฺฆสฺส สตสหสฺสํ ฯ จตูสุ ทฺวาเรสุ เภสชฺชตฺถํ สตสหสฺสํ ฯ เอวํ สาสเน อุฬาโร ลาภสกฺกาโร นิพฺพตฺติ ฯ ติตฺถิยา ปริหีนลาภสกฺการา อนฺตมโส ฆาสจฺฉาทนมตฺตมฺปิ อลภนฺตา ลาภสกฺการํ ปฏฺฐยมานา สาสเน ปพฺพชิตฺวา สกานิ สกานิ ทิฏฺฐิคตานิ อยํ ธมฺโม อยํ วินโยติ ทีเปนฺติ ฯ ปพฺพชฺชํ อลภมานาปิ สยเมว มุณฺเฑตฺวา กาสายานิ อจฺฉาเทตฺวา วิหาเรสุ วิจรนฺตา อุโปสถมฺปิ ปวารณมฺปิ สงฺฆกมฺมมฺปิ คณกมฺมมฺปิ ปวิสนฺติ ฯ ภิกฺขู เตหิ สทฺธึ อุโปสถํ น กโรนฺติ ฯ ตทา โมคฺคลีปุตฺตติสฺสตฺเถโร อุปฺปนฺนํทานิ อธิกรณํ ตํ นจิรสฺเสว กกฺขฬํ ภวิสฺสติ น โข ปเนตํ สกฺกา อิเมสํ มชฺเฌ วสนฺเตน วูปสเมตุนฺติ มหินฺทตฺเถรสฺส คณํ นิยฺยาเทตฺวา อตฺตนา ผาสุกวิหาเรน วิหริตุกาโม อโธคงฺคํ ปพฺพตํ อคมาสิ ฯ เตปิ โข ติตฺถิยา ภิกฺขุสงฺเฆน ธมฺเมน วินเยน สตฺถุ สาสเนน นิคฺคยฺหมานาปิ ธมฺมวินยานุโลมาย ปฏิปตฺติยา อสณฺฐหนฺตา อเนกรูปํ สาสนสฺส อพฺพุทญฺจ มลญฺจ กณฺฏกญฺจ สมุฏฺฐาเปสุํ ฯ เกจิ อคฺคึ ปริจรนฺติ ฯ เกจิ ปญฺจาตเป ตปฺปนฺติ ฯ เกจิ อาทิจฺจํ อนุปริวตฺตนฺติ ฯ เกจิ ธมฺมญฺจ วินยญฺจ โว ภินฺทิสฺสามาติ ๑- ปคฺคณฺหึสุ ฯ ตทา ภิกฺขุสงฺโฆ น เตหิ สทฺธึ อุโปสถํ วา ปวารณํ วา อกาสิ ฯ อโสการาเม สตฺต วสฺสานิ อุโปสโถ อุปจฺฉิชฺชิ ฯ รญฺโญปิ เอตมตฺถํ อาโรเจสุํ ฯ ราชา เอกํ อมจฺจํ อาณาเปติ วิหารํ คนฺตฺวา อธิกรณํ วูปสเมตฺวา อุโปสถํ การาเปหีติ ฯ อมจฺโจ ราชานํ ปฏิปุจฺฉิตุํ อวิสหนฺโต อญฺเญ อมจฺเจ อุปสงฺกมิตฺวา อาห ราชา มํ วิหารํ คนฺตฺวา อธิกรณํ วูปสเมตฺวา อุโปสถํ กโรหีติ ปหิณิ กถนฺนุโข อธิกรณํ วูปสมฺมตีติ ฯ เต อาหํสุ มยํ เอวํ สลฺลกฺเขม ยถา นาม ปจฺจนฺตํ วูปสเมนฺตา โจเร ฆาเตนฺติ เอวเมว เย อุโปสถํ น กโรนฺติ เต มาราเปตุกาโม ราชา ภวิสฺสตีติ ฯ อถ โส อมจฺโจ วิหารํ คนฺตฺวา ภิกฺขุสงฺฆํ สนฺนิปาเตตฺวา อาห อหํ รญฺญา อุโปสถํ การาเปหีติ เปสิโต กโรถ ทานิ ภนฺเต อุโปสถกมฺมนฺติ ฯ ภิกฺขู น มยํ ติตฺถิเยหิ สทฺธึ อุโปสถํ กโรมาติ อาหํสุ ฯ อมจฺโจ เถราสนโต ปฏฺฐาย อสินา สีสานิ ปาเตตุํ อารทฺโธ ฯ อทฺทสา โข ติสฺสตฺเถโร ตํ อมจฺจํ ตถา วิปฏิปนฺนํ ฯ