ติสฺสตฺเถโร นาม น โย โส รญฺโญ เอกมาติโก ภาตา ติสฺสกุมาโร นาม ฯ ตํ กิร ราชา ปตฺตาภิเสโก อุปรชฺเช ฐเปสิ ฯ โส เอกทิวสํ วนจรํ คโต อทฺทส มหนฺตํ มิคสงฺฆํ จิตฺตาย กีฬิกาย

กีฬนฺตํ ฯ ทิสฺวานสฺส เอตทโหสิ อิเม ตาว ติณภกฺขา มิคา เอวํ กีฬนฺติ อิเม ปน สมณา ราชกุเล ปณีตานิ โภชนานิ ภุญฺชิตฺวา มุทุกาสุ เสยฺยาสุ สยมานา กึว มนาปํ กีฬิตํ น กิฬิสฺสนฺตีติ ฯ โส ตโต อาคนฺตฺวา อิมํ อตฺตโน วิตกฺกํ รญฺโญ อาโรเจสิ ฯ ราชา อฏฺฐาเน กุกฺกุจฺจายิตํ กุมาเรน หนฺท นํ เอวํ สญฺญาเปสฺสามีติ เอกทิวสํ เกนจิ การเณน กุทฺโธ วิย เอหิ สตฺต ทิวเส รชฺชํ สมฺปฏิจฺฉ ตโต ตํ ฆาเตสฺสามีติ มรณภเยน ตชฺเชตฺวา ตมตฺถํ สญฺญาเปสิ ฯ โส กิร กุมาโร สตฺตเม ทิวเส มํ มาราเปสฺสตีติ น จิตฺตรูปํ นหายิ น ภุญฺชิ น สุปิ อติวิย ลูขสรีโร อโหสิ ฯ ตโต นํ ราชา ปุจฺฉิ กิสฺส ตฺวํ เอวรูโป ชาโตติ ฯ มรณภเยน เทวาติ ฯ อเร ตฺวํ นาม ปริจฺฉินฺนมรณํ สมฺปสฺสมาโน วิสฺสตฺโถ น กีฬสิ ภิกฺขู อสฺสาสปฺปสฺสาสูปนิพทฺธํ มรณํ เปกฺขมานา กถํ กีฬิสฺสนฺตีติ ฯ ตโต ปภูติ กุมาโร สาสเน ปสีทิ ฯ โส ปุเนกทิวสํ มิควํ นิกฺขมิตฺวา อรญฺเญ อนุวิจรมาโน อทฺทส โยนกมหาธมฺมรกฺขิตฺตตฺเถรํ อญฺญตเรน หตฺถินาเคน สาลสาขํ คเหตฺวา วีชิยมานํ นิสินฺนํ ฯ ทิสฺวาน ปามุชฺชชาโต จินฺเตสิ กทา นุโข อหมฺปิ อยํ มหาเถโร วิย ปพฺพเชยฺยํ สิยา นุโข โส ทิวโสติ ฯ เถโร ตสฺส อชฺฌาสยํ วิทิตฺวา ตสฺส ปสฺสนฺตสฺเสว อากาเส อุปฺปติตฺวา อโสการาเม โปกฺขรณิยา อุทกตเล ฐตฺวา จีวรญฺจ อุตฺตราสงฺคญฺจ อากาเส ลคฺเคตฺวา นหายิตุํ อารทฺโธ ฯ กุมาโร เถรสฺสานุภาวํ ทิสฺวา อติวิย ปสนฺโน อชฺเชว ปพฺพชิสฺสามีติ นิวตฺติตฺวา รญฺโญ อาโรเจสิ ปพฺพชิสฺสามหํ เทวาติ ฯ ราชา อเนกปฺปการํ ยาจิตฺวา ตํ นิวตฺเตตุํ อสกฺโกนฺโต อโสการามคมนียํ มคฺคํ อลงฺการาเปตฺวา กุมารํ ฉณเวสํ คาหาเปตฺวา อลงฺกตาย เสนาย ปริวาราเปตฺวา วิหารํ เนสิ ฯ ยุวราชา กิร ปพฺพชิสฺสตีติ สุตฺวา พหู ภิกฺขู ปตฺตจีวรานิ ปฏิยาเทสุํ ฯ กุมาโร ปธานฆรํ คนฺตฺวา มหาธมฺมรกฺขิตตฺเถรสฺเสว สนฺติเก ปพฺพชิ สทฺธึ ปุริสสตสหสฺเสน ฯ กุมารสฺส ปน อนุปพฺพชิตกานํ คณนปริจฺเฉโท นตฺถิ ฯ กุมาโร รญฺโญ จตุวสฺสาภิเสกกาเล ปพฺพชิโต ฯ อถ อญฺโญ รญฺโญ ภาคิเนยฺโย สงฺฆมิตฺตาย สามิโก อคฺคิพฺรหฺมา นาม กุมาโร อตฺถิ ฯ สงฺฆมิตฺตา ตสฺส เอกเมว ปุตฺตํ วิชายิ ฯ โสปิ ยุวราชา ปพฺพชิโตติ สุตฺวา ราชานํ อุปสงฺกมิตฺวา อหมฺปิ เทว ปพฺพชิสฺสามีติ ยาจิ ฯ ปพฺพช ตาตาติ จ รญฺญา อนุญฺญาโต ตํ ทิวสเมว ปพฺพชิ ฯ เอวํ อนุปพฺพชิโต อุฬารวิภเวน ขตฺติยชเนน รญฺโญ กนิฏฺฐภาตา ติสฺสตฺเถโรติ วิญฺเญยฺโย ฯ