สีวตฺเถโร จ เมธาวี วินเย สพฺพตฺถ โกวิโท

เอเต นาคา มหาปญฺญา วินยญฺญู มคฺคโกวิทา

วินยํ ทีเป ปกาเสสุํ ปิฏกํ ตมฺพปณฺณิยาติ ฯ

ตตฺรายํ อนุปุพฺพีกถา ฯ โมคฺคลีปุตฺตติสฺสตฺเถโร กิร อิมํ ตติยสงฺคีตึ กตฺวา เอวํ จินฺเตสิ ตตฺถ นุโข อนาคเต สาสนํ สุปฺปติฏฺฐิตํ ภเวยฺยาติ ฯ อถสฺส อุปปริกฺขโต เอตทโหสิ ปจฺจนฺติเมสุ ชนปเทสุ สุปฺปติฏฺฐิตํ ภวิสฺสตีติ ฯ โส เตสํ ภิกฺขูนํ ภารํ กตฺวา เต เต ภิกฺขู ตตฺถ ตตฺถ เปเสสิ ฯ มชฺฌนฺติกตฺเถรํ กสฺมีรคนฺธารรฏฺฐํ เปเสสิ ตฺวํ เอตํ รฏฺฐํ คนฺตฺวา เอตฺถ สาสนํ ปติฏฺฐาเปหีติ ฯ มหาเทวตฺเถรํ ตเถว วตฺวา มหิสกมณฺฑลํ เปเสสิ ฯ รกฺขิตตฺเถรํ วนวาสึ ฯ โยนกธมฺมรกฺขิตตฺเถรํ อปรนฺตกํ ฯ มหาธมฺมรกฺขิตตฺเถรํ มหารฏฺฐํ ฯ มหารกฺขิตตฺเถรํ โยนกโลกํ ฯ มชฺฌิมตฺเถรํ หิมวนฺตปฺปเทสภาคํ ฯ โสณกตฺเถรญฺจ อุตฺตรตฺเถรญฺจ สุวณฺณภูมึ ฯ อตฺตโน สทฺธิวิหาริกํ มหินฺทตฺเถรํ อิฏฺฏิยตฺเถเรน อุตฺติยตฺเถเรน สมฺพลตฺเถเรน ภทฺทสาลตฺเถเรน สทฺธึ ตมฺพปณฺณิทีปํ เปเสสิ ตุมฺเห ตมฺพปณฺณิทีปํ คนฺตฺวา เอตฺถ สาสนํ ปติฏฺฐาเปถาติ ฯ สพฺเพปิ ตํ ตํ ทิสาภาคํ คจฺฉนฺตา อตฺตปญฺจมา อคมํสุ ปจฺจนฺติเมสุ ชนปเทสุ ปญฺจวคฺโค คโณ อลํ อุปสมฺปทกมฺมายาติ มญฺญมานา ฯ