รกฺขิตตฺเถโร ปน วนวาสึ คนฺตฺวา อากาเส ฐตฺวา อนมตคฺคปริยายกถาย วนวาสิเก ปสาเทสิ ฯ กถาปริโยสาเน ปนสฺส สฏฺฐิสหสฺสานํ ธมฺมาภิสมโย อโหสิ ฯ สตฺตตฺตึสสหสฺสมตฺตา ปพฺพชึสุ ฯ ปญฺจ วิหารสตานิ ปติฏฺฐหึสุ ฯ เอวํ โส ตตฺถ สาสนํ ปติฏฺฐาเปสิ ฯ

คนฺตฺวาน รกฺขิตตฺเถโร วนวาสึ มหิทฺธิโก

อนฺตลิกฺเข ฐิโต ตตฺถ เทเสสิ อนมตคฺคิยนฺติ ฯ

โยนกธมฺมรกฺขิตตฺเถโรปิ อปรนฺตกํ คนฺตฺวา อคฺคิกฺขนฺธูปมสุตฺตนฺตกถาย อปรนฺตเก ปสาเทตฺวา สตฺตตฺตึสปาณสหสฺสานิ ธมฺมามตํ ปาเยสิ ฯ ขตฺติยกุลโตเยว ปุริสสหสฺสํ ปพฺพชิ ฯ สมธิกานิ จ ฉ อิตฺถีสหสฺสานิ ฯ เอวํ โส ตตฺถ สาสนํ ปติฏฺฐาเปสิ ฯ