มชฺฌิมตฺเถโร ปน กสฺสปโคตฺตตฺเถเรน อฬกเทวตฺเถเรน ทุนฺทุภิสฺสรตฺเถเรน สหสฺสเทวตฺเถเรน จ สทฺธึ หิมวนฺตปฺปเทสภาคํ คนฺตฺวา ธมฺมจกฺกปฺปวตฺตนสุตฺตนฺตกถาย ตํ ปเทสํ ปสาเทตฺวา อสีติปาณโกฏิโย มคฺคผลรตนานิ ปฏิลาเภสิ ฯ ปญฺจปิ เจเต เถรา ปญฺจ รฏฺฐานิ ปสาเทสุํ ฯ เอกเมกสฺส สนฺติเก สตสหสฺสมตฺตา ปพฺพชึสุ ฯ เอวํ เต ตตฺถ สาสนํ ปติฏฺฐาเปสุํ ฯ

คนฺตฺวาน มชฺฌิมตฺเถโร หิมวนฺตํ ปสาทยิ

ยกฺขเสนํ ปกาเสนฺโต ธมฺมจกฺกปฺปวตฺตนฺติ ฯ

โสณกตฺเถโรปิ สทฺธึ อุตฺตรตฺเถเรน สุวณฺณภูมึ อคมาสิ ฯ เตน จ สมเยน ตตฺถ เอกา รกฺขสี สมุทฺทโต นิกฺขมิตฺวา ราชกุเล ชาเต ชาเต ทารเก ขาทติ ฯ ตํทิวสเมว ราชกุเล เอโก ทารโก ชาโต โหติ ฯ มนุสฺสา เถรํ ทิสฺวา รกฺขสานํ สหายโก เอโสติ มญฺญมานา อาวุธานิ คเหตฺวา เถรํ ปหริตุกามา คจฺฉนฺติ ฯ เถโร กึ ตุมฺเห อาวุธหตฺถา อาคจฺฉถาติ อาห ฯ เต อาหํสุ ราชกุเล ชาเต ชาเต ทารเก รกฺขสา ขาทนฺติ เตสํ ตุมฺเห สหายกาติ ฯ เถโร น มยํ รกฺขสสหายกา สมณา นาม มยํ วิรตา ปาณาติปาตา ฯเปฯ วิรตา มชฺชปานา เอกภตฺติกา สีลวนฺโต พฺรหฺมจาริโน กลฺยาณธมฺมาติ อาห ฯ ตสฺมึเยว จ ขเณ สา รกฺขสี สปริวารา สมุทฺทโต นิกฺขมิ ราชกุเล ทารโก ชาโต ตํ ขาทิสฺสามาติ ฯ มนุสฺสา ตํ ทิสฺวา เอสา ภนฺเต รกฺขสี อาคจฺฉตีติ ภีตา วิรวึสุ ฯ เถโร รกฺขเสหิ ทฺวิคุเณ อตฺตภาเว นิมฺมินิตฺวา เตหิ อตฺตภาเวหิ ตํ รกฺขสึ สปริสํ มชฺเฌ กตฺวา อุโภสุ ปสฺเสสุ ปริกฺขิปิ ฯ ตสฺสา สปริสาย เอตทโหสิ อทฺธา อิเมหิ อิทํ ฐานํ ลทฺธํ ภวิสฺสติ มยํ ปน อิเมสํ ภกฺขา ภวิสฺสามาติ ฯ สพฺเพ รกฺขสา เวคสา ปลายึสุ ฯ เถโรปิ เต ยาว อทสฺสนํ ตาว ปลาเปตฺวา ทีปสฺส สมนฺตโต อารกฺขํ ฐเปสิ ฯ ตสฺมึ ปน สมเย สนฺนิปติตํ มหาชนกายํ พฺรหฺมชาลสุตฺตนฺตกถาย ปสาเทตฺวา สรเณสุ จ สีเลสุ จ ปติฏฺฐาเปสิ ฯ สฏฺฐิสหสฺสานํ ปเนตฺถ ธมฺมาภิสมโย อโหสิ ฯ กุลทารกานํ อฑฺฒุฑฺฒานิ สหสฺสานิ ปพฺพชึสุ ฯ กุลธีตานํ ทิยฑฺฒสหสฺสํ ฯ เอวํ โส ตตฺถ สาสนํ ปติฏฺฐาเปสิ ฯ ตโต ปภูติ ราชกุเล ชาตทารกานํ โสณุตฺตรนามเมว กโรนฺติ ฯ