อิติ เหเต มหานาคา มนฺตยึสุ รโหคตาติ ฯ ตทา สกฺโก เทวานมินฺโท มหินฺทตฺเถรํ อุปสงฺกมิตฺวา เอตทโวจ กาลกโต ภนฺเต มุฏสีวราชา อิทานิ เทวานํปิยติสฺสมหาราชา รชฺชํ กาเรสิ สมฺมาสมฺพุทฺเธน จ ตุมฺเห พฺยากตา อนาคเต มหินฺโท นาม ภิกฺขุ ตมฺพปณฺณิทีปํ ปสาเทสฺสตีติ ตสฺมาติห โว ภนฺเต กาโล ทีปวรํ คมนาย อหมฺปิ โว สหาโย ภวิสฺสามีติ ฯ กสฺมา ปน สกฺโก เอวมาห ฯ ภควา กิรสฺส โพธิมูเลเอว พุทฺธจกฺขุนา โลกํ โวโลเกตฺวา อนาคเต อิมสฺส ทีปสฺส สมฺปตฺตึ ทิสฺวา เอตมตฺถํ อาโรเจสิ ตทา ตฺวํปิ สหาโย ภเวยฺยาสีติ จ อาณาเปสิ ฯ ตสฺมา เอวมาห ฯ เถโร ตสฺส วจนํ สมฺปฏิจฺฉิตฺวา อตฺตสตฺตโม เวทิสปพฺพตา เวหาสํ อุปฺปติตฺวา อนุราธปุรสฺส ปุรตฺถิมทิสาย มิสฺสกปพฺพเต ปติฏฺฐหิ ยํ เอตรหิ เจติยปพฺพโตติปิ สญฺชานนฺติ ฯ เตนาหุ โปราณา

เวทิสคิริมฺหิ ราชคเห วสิตฺวา ตึสรตฺติโย

กาโลว คมนสฺสาติ คจฺฉาม ทีปมุตฺตมํ

ปฬีนา ชมฺพุทีปาโต หํสราชาว อมฺพเร