เอวมุปฺปติตา เถรา นิปตึสุ นคุตฺตเม

ปุรโต ปุรเสฏฺฐสฺส ปพฺพเต เมฆสนฺนิเภ

ปติฏฺฐหึสุ ปิฬกูฏมฺหิ หํสาว นคมุทฺธนีติ ฯ เอวํ อิฏฺฏิยาทีหิ สทฺธึ อาคนฺตฺวา ปติฏฺฐหนฺโต จ อายสฺมา มหินฺทตฺเถโร สมฺมาสมฺพุทฺธสฺส ปรินิพฺพานโต ทฺวินฺนํ วสฺสสตานํ อุปริ ฉตฺตึสติเม วสฺเส อิมสฺมึ ทีเป ปติฏฺฐหีติ เวทิตพฺโพ ฯ

อชาตสตฺตุสฺส หิ อฏฺฐเม วสฺเส สมฺมาสมฺพุทฺโธ ปรินิพฺพายิ ฯ ตสฺมึเยว วสฺเส สีหกุมารสฺส ปุตฺโต ตมฺพปณฺณิทีปสฺส อาทิราชา วิชยกุมาโร อิมํ ทีปมาคนฺตฺวา มนุสฺสาวาสํ อกาสิ ฯ ชมฺพุทีเป อุทยภทฺทสฺส จุทฺทสเม วสฺเส อิธ วิชโย กาลมกาสิ ฯ อุทยภทฺทสฺส ปญฺจทสเม วสฺเส ปณฺฑุวาสุเทโว นาม อิมสฺมึ ทีเป รชฺชํ ปาปุณิ ฯ ตตฺถ นาคทสฺสกรญฺโญ วีสติเม วสฺเส อิธ ปณฺฑุวาสุเทโว กาลมกาสิ ฯ ตสฺมึเยว วสฺเส อภโย นาม ราชกุมาโร อิมสฺมึ ทีเป รชฺชํ ปาปุณิ ฯ ตตฺถ สุสูนาครญฺโญ สตฺตรสเม วสฺเส อิธ อภยรญฺโญ วีสติวสฺสานิ ปริปูรึสุ ฯ อถ อภยสฺส วีสติเม วสฺเส ปกุณฺฑกาภโย นาม ทามริโก รชฺชํ อคฺคเหสิ ฯ ตตฺถ กาฬาโสกสฺส โสฬสเม วสฺเส อิธ ปกุณฺฑกสฺส สตฺตรส วสฺสานิ ปริปูรึสุ ฯ ตานิ เหฏฺฐา เอเกน วสฺเสน สห อฏฺฐารส โหนฺติ ฯ ตตฺถ จนฺทคุตฺตสฺส จุทฺทสเม วสฺเส อิธ ปกุณฺฑกาภโย กาลมกาสิ ฯ มุฏสีวราชา รชฺชํ ปาปุณิ ฯ ตตฺถ อโสกธมฺมราชสฺส สตฺตรสเม วสฺเส อิธ มุฏสีวราชา กาลมกาสิ ฯ เทวานํปิยติสฺโส รชฺชํ ปาปุณิ ฯ ปรินิพฺพุเต จ สมฺมาสมฺพุทฺเธ อชาตสตฺตุ จตุวีสติ วสฺสานิ รชฺชํ กาเรสิ ฯ อุทยภทฺโท จ โสฬส ฯ อนุรุทฺโธ จ มุณฺโฑ จ อฏฺฐ ฯ นาคทสฺสโก จตุวีสติ ฯ สุสูนาโค อฏฺฐารส ฯ ตสฺเสว ปุตฺโต อโสโก อฏฺฐวีสติ ฯ อโสกสฺส ปุตฺตา ทสภาตุกราชาโน เทฺววีสติวสฺสานิ รชฺชํ กาเรสุํ ฯ เตสํ ปจฺฉโต นว นนฺทา เทฺววีสติเมว ฯ จนฺทคุตฺโต จตุวีสติ ฯ วินฺทุสาโร ๑- อฏฺฐวีสติ ฯ ตสฺสาวสาเน อโสโก รชฺชํ ปาปุณิ ฯ ตสฺส ปุเร อภิเสกา จตฺตาริ ฯ อภิเสกโต อฏฺฐารสเม วสฺเส อิมสฺมึ ทีเป มหินฺทตฺเถโร ปติฏฺฐิโต ฯ เอวเมเตน ราชวํสานุสาเรน เวทิตพฺพเมตํ สมฺมาสมฺพุทฺธสฺส ปรินิพฺพานโต ทฺวินฺนํ วสฺสสตานํ อุปริ ฉตฺตึสติเม วสฺเส อิมสฺมึ ทีเป ปติฏฺฐหีติ ฯ