โส อจิรสฺสุตํ ตํ สาสนปฺปวุตฺตึ อนุสฺสรมาโน ตํ เถรสฺส สมณา มยํ มหาราช ธมฺมราชสฺส สาวกาติ วจนํ สุตฺวา อยฺยา นุโข อาคตาติ ตาวเทว อาวุธํ นิกฺขิปิตฺวา เอกมนฺตํ นิสีทิ

สมฺโมทนียํ กถํ กถยมาโน ฯ ยถาห ฯ

อาวุธํ นิกฺขิปิตฺวาน เอกมนฺตํ อุปาวิสิ

นิสชฺช ราชา สมฺโมทิ พหุํ อตฺถูปสํหิตนฺติ ฯ สมฺโมทนียํ กถญฺจ กุรุมาเนเยว ตสฺมึ ตานิปิ จตฺตาฬีสปุริสสหสฺสานิ อาคนฺตฺวา ตํ ปริวาเรสุํ ฯ ตทา เถโร อิตเรปิ ฉ ชเน ทสฺเสสิ ฯ ราชา ทิสฺวา อิเม กทา อาคตาติ อาห ฯ มยา สทฺธึเยว มหาราชาติ ฯ อิทานิ ปน ชมฺพุทีเป อญฺเญปิ เอวรูปา สมณา สนฺตีติ ฯ สนฺติ มหาราช เอตรหิ ชมฺพุทีโป กาสาวปฺปชฺโชโต อิสิวาตปฏิวาโต ตสฺมึ