ปุณฺณมายํ มหาวีโร จาตุมฺมาสินิยา อิธ

อาคนฺตฺวา เทวโลกมฺหา หตฺถิกุมฺเภ ปติฏฺฐิโตติ ฯ อถ โส หตฺถินาโค อเนกตาลาวจรปริวาริโต อติวิย อุฬาเรน ปูชาสกฺกาเรน สกฺกริยมาโน ปจฺฉิมทิสาภิมุโข หุตฺวา อปสกฺกนฺโต ยาว นครสฺส ปุรตฺถิมทฺวารํ ตาว คนฺตฺวา ปุรตฺถิมทฺวาเรน นครํ ปวิสิตฺวา สกลนาคเรหิ อุฬาราย ปูชาย กริยมานาย ทกฺขิณทฺวาเรน นิกฺขมิตฺวา ถูปารามสฺส ปจฺฉิมทิสาภาเค มเหชวตฺถุ นาม กิร อตฺถิ ตตฺถ คนฺตฺวา ปุน ถูปารามาภิมุโขเยว ปฏินิวตฺติ ฯ เตน จ สมเยน ถูปาราเม ปุริมกานํ ติณฺณํ สมฺมาสมฺพุทฺธานํ ปริโภคเจติยฏฺฐานํ โหติ ฯ

อตีเต กิร อยํ ทีโป โอชทีโป นาม อโหสิ ฯ ราชา อภโย นาม ฯ นครํ อภยปุรนฺนาม ฯ เจติยปพฺพโต เทวกูฏปพฺพโต นาม ฯ ถูปาราโม ปฏิยาราโม นาม ฯ เตน โข ปน สมเยน กกุสนฺโธ ภควา โลเก อุปฺปนฺโน โหติ ฯ ตสฺส สาวโก มหาเทโว นาม ภิกฺขุสหสฺเสน สทฺธึ เทวกูเฏ ปติฏฺฐาสิ มหินฺทตฺเถโร วิย เจติยปพฺพเต ฯ เตน สมเยน โอชทีเป สตฺตา ปชฺชรเกน อนยพฺยสนํ อาปชฺชนฺติ ฯ อทฺทสา โข กกุสนฺโธ ภควา พุทฺธจกฺขุนา โลกํ โวโลเกนฺโต เต สตฺเต อนยพฺยสนมาปชฺชนฺเต ฯ ทิสฺวา จตฺตาฬีสาย ภิกฺขุสหสฺเสน ปริวุโต อคมาสิ ฯ ตสฺสานุภาเวน ตาวเทว ปชฺชรโก วูปสนฺโต ฯ โรเค วูปสนฺเต ภควา ธมฺมํ เทเสสิ ฯ จตุราสีติยา ปาณสหสฺสานํ ธมฺมาภิสมโย อโหสิ ฯ ภควา ธมฺมกรกํ ทตฺวา ปกฺกามิ ฯ ตํ อนฺโต ปกฺขิปิตฺวา ปฏิยาราเม เจติยํ อกํสุ ฯ มหาเทโว ทีปํ อนุสาสนฺโต วิหาสิ ฯ โกนาคมนสฺส ปน ภควโต กาเล อยํ ทีโป วรทีโป นาม อโหสิ ฯ ราชา สมิทฺธิ นาม ฯ นครํ วฑฺฒมานํ นาม ฯ ปพฺพโต สุวณฺณกูโฏ นาม ฯ เตน โข ปน สมเยน วรทีเป ทุพฺพุฏฺฐิกา โหติ ทุพฺภิกฺขํ ทุสฺสสฺสํ ฯ สตฺตา ฉาตกโรเคน อนยพฺยสนํ อาปชฺชนฺติ ฯ อทฺทสา โข โกนาคมโน ภควา พุทฺธจกฺขุนา โลกํ โวโลเกนฺโต เต สตฺเต อนยพฺยสนํ อาปชฺชนฺเต ฯ ทิสฺวา ตึสภิกฺขุสหสฺสปริวุโต อคมาสิ ฯ พุทฺธานุภาเวน เทโว สมฺมาธารํ อนุปฺปเวจฺฉิ ฯ สุภิกฺขํ อโหสิ ฯ ภควา ธมฺมํ เทเสสิ ฯ จตุราสีติยา ปาณสหสฺสานํ ธมฺมาภิสมโย อโหสิ ฯ ภควา ภิกฺขุสหสฺสปริวารํ มหาสุมนํ นาม เถรํ ทีเป ฐเปตฺวา กายพนฺธนํ ทตฺวา ปกฺกามิ ฯ ตํ อนฺโต ปกฺขิปิตฺวา เจติยมกํสุ ฯ กสฺสปสฺส ปน ภควโต กาเล อยํ ทีโป มณฺฑทีโป นาม อโหสิ ฯ ราชา ชยนฺโต นาม ฯ นครํ วิสาลํ นาม ฯ ปพฺพโต สุภกูโฏ นาม ฯ เตน โข ปน สมเยน มณฺฑทีเป มหาวิวาโท โหติ ฯ พหู สตฺตา กลหวิคฺคหชาตา อนยพฺยสนํ อาปชฺชนฺติ ฯ อทฺทสา โข กสฺสโป ภควา พุทฺธจกฺขุนา โลกํ โวโลเกนฺโต เต สตฺเต อนยพฺยสนํ อาปชฺชนฺเต ฯ ทิสฺวา วีสติภิกฺขุสหสฺสปริวุโต อาคนฺตฺวา วิวาทํ วูปสเมตฺวา ธมฺมํ เทเสสิ ฯ จตุราสีติยา ปาณสหสฺสานํ ธมฺมาภิสมโย อโหสิ ฯ ภควา ภิกฺขุสหสฺสปริวารํ สพฺพนนฺทึ นาม เถรํ ทีเป ปติฏฺฐาเปตฺวา อุทกสาฏิกํ ทตฺวา ปกฺกามิ ฯ ตํ อนฺโต ปกฺขิปิตฺวา เจติยมกํสุ ฯ เอวํ ถูปาราเม ปุริมกานํ ติณฺณํ สมฺมาสมฺพุทฺธานํ ปริโภคเจติยานิ ปติฏฺฐหึสุ ฯ ตานิ สาสนนฺตรธาเนน นสฺสนฺติ ฯ ฐานมตฺตํ อวสิสฺสติ ฯ ตสฺมา วุตฺตํ เตน จ สมเยน ถูปาราเม ปุริมกานํ ติณฺณํ สมฺมาสมฺพุทฺธานํ ปริโภคเจติยฏฺฐานํ โหตีติ ฯ