{122} Idāni tattha tattha ṭhānā cāvanavasena vuttassa adinnādānassa aṅgañca vatthubhedena ca āpattibhedaṃ dassento pañcahākārehīti- ādimāha. Tattha pañcahākārehīti pañcahi kāraṇehi. Pañcaaṅgehīti vuttaṃ hoti. Tatrāyaṃ saṅkhepattho adinnaṃ ādiyantassa paraparigagahitañca hotītiādinā nayena vuttehi pañcahākārehi pārājikaṃ hoti na tato ūnehīti. Tatrime pañca ākārā parapariggahitaṃ parapariggahitasaññā parikkhārassa garukabhāvo theyyacittaṃ ṭhānā cāvananti. Ito parehi pana dvīhi vārehi lahuke parikkhāre vatthubhedena thullaccayañca dukkaṭañca dassitaṃ. {125} Chahākārehītiādinā nayena vuttavārattayepi na sakasaññitā na vissāsaggāhitā na tāvakālikatā parikkhārassa garukabhāvo theyyacittaṃ ṭhānā cāvananti evaṃ Cha ākārā veditabbā. Vatthubhedena panetthāpi paṭhamavāre pārājikaṃ dutiyatatiyesu thullaccayadukkaṭāni vuttāni. Tato paresu pana tīsu vāresu vijjamānepi vatthubhede vatthussa parehi apariggahitattā dukkaṭameva vuttaṃ. Tatra yadetaṃ na ca parapariggahitanti vuttaṃ taṃ anajjhāvatthukaṃ vā hotu chaḍḍitaṃ chinnamūlakaṃ assāmikaṃ vatthu attano santakaṃ vā ubhayampi na ca parapariggahitantveva saṅkhyaṃ gacchati. Yasmā panettha parapariggahitasaññā ca atthi theyyacittena ca gahitaṃ tasmā anāpatti na vuttāti.