Evaṃ vitthāravasena āpattibhedaṃ dassetvā idāni anāpattiṃ dassento anāpatti adhimānenātiādimāha. Tattha adhimānenāti adhikamānena samudācarantassa anāpatti. Anullapanādhippāyassāti kohaññena icchācāre aṭṭhatvā anullapanādhippāyassa sabrahmacārīnaṃ santike aññaṃ byākarontassa anāpatti. Ummattakādayo pubbe vuttanayāeva. Idha pana ādikammikā vaggumudātīriyā bhikkhū tesaṃ anāpattīti.

Padabhājanīyavaṇṇanā niṭṭhitā.

Samuṭṭhānādīsu. Idaṃ sikkhāpadaṃ tisamuṭṭhānaṃ hatthamuddhāya ārocentassa kāyacittato vacībhedena ārocentassa vācācittato ubhayaṃ karontassa kāyavācācittato samuṭṭhāti kiriyā saññāvimokkhaṃ sacittakaṃ lokavajjaṃ kāyakammaṃ vacīkammaṃ akusalacittaṃ tivedanikaṃ. Hasantopi hi somanissito ullapati bhāyantopi majjhattopi.

{223} Vinītavatthūsu adhimānavatthu anuppaññattiyaṃ vuttanayameva.