aññattha samayo vutto karaṇeneva so idhāti. Porāṇā pana vaṇṇayanti taṃ samayanti vā tasmiṃ samayeti vā tena samayenāti vā abhilāpamattabhedo esa sabbattha bhummameva atthoti. Tasmā tesaṃ laddhiyā tena samayenāti vuttepi tasmiṃ samayeti attho veditabbo.
Buddho bhagavāti imesaṃ padānaṃ parato atthaṃ vaṇṇayissāmi.
Verañjāyaṃ viharatīti ettha pana verañjāti aññatarassa nagarassetaṃ adhivacanaṃ. Tassaṃ verañjāyaṃ. Samīpatthe bhummavacanaṃ. Viharatīti avisesena iriyāpathadibbabrahmaariyavihāresu aññataravihārasamaṅgiparidīpanametaṃ. Idha pana ṭhānagamanāsanasayanappabhedesu iriyāpathesu aññatarairiyāpathasamāyogaparidīpanaṃ. Tena ṭhitopi gacchantopi nisinnopi sayānopi bhagavā viharaticceva veditabbo. So hi ekaṃ iriyāpathabādhanaṃ aññena iriyāpathena vicchinditvā aparipatantaṃ attabhāvaṃ harati pavatteti tasmā viharatīti vuccati.
Naḷerupucimandamūleti ettha naḷeru nāma yakkho. Pucimandoti nimbarukkho. Mūlanti samīpaṃ. Ayaṃ hi mūlasaddo mūlāni uddhareyya antamaso usīranāḷamattānipītiādīsu mūlamūle dissati. Lobho akusalamūlantiādīsu asādhāraṇahetumhi. Yāva majjhantike Kāle chāyā pharati nivāte paṇṇāni patanti ettāvatā rukkhamūlantiādīsu samīpe. Idha pana samīpe adhippeto. Tasmā naḷeruyakkhena adhigahitassa pucimandassa samīpeti evamettha attho daṭṭhabbo. So kira pucimando rammaṇīyo pāsādiko anekesaṃ rukkhānaṃ adhipaccaṃ viya kurumāno tassa nagarassa avidūre gamanāgamanasampanne ṭhāne ahosi. Athakho bhagavā verañjaṃ gantvā paṭirūpe ṭhāne viharanto tassa rukkhassa samīpe heṭṭhābhāge vihāsi. Tena vuttaṃ verañjāyaṃ viharati naḷerupucimandamūleti. Tattha siyā yadi tāva bhagavā verañjāyaṃ viharati naḷerupucimandamūleti na vattabbaṃ atha tattha viharati verañjāyanti na vattabbaṃ na hi sakkā ubhayattha teneva samayena apubbaṃ acarimaṃ viharitunti. Nakhopanetaṃ evaṃ daṭṭhabbaṃ nanu avocumhā samīpatthe bhummavacananti tasmā yathā gaṅgāyamunādīnaṃ samīpe goyūthāni carantāni gaṅgāya caranti yamunāya carantīti vuccanti evamidhāpi yadidaṃ verañjāya samīpe naḷerupucimandamūlaṃ tattha viharanto vuccati verañjāyaṃ viharati naḷerupucimandamūleti. Gocaragāmanidassanatthaṃ hissa verañjāvacanaṃ. Pabbajitānurūpanivāsanaṭṭhānanidassanatthaṃ naḷerupucimandamūlavacanaṃ. Tattha verañjākittanena āyasmā upālitthero bhagavatā gahaṭṭhānuggahakaraṇaṃ dasseti. Naḷerupucimandamūlakittanena pabbajitānuggahakaraṇaṃ. Tathā purimena paccayaggahaṇato attakilamathānuyogavivajjanaṃ pacchimena vatthukāmappahānato kāmasukhallikānuyogavivajjanupāyanidassanaṃ. Purimena