Sabbathā viditalokattā pana lokavidū. So hi bhagavā sabhāvato samudayato nirodhato nirodhūpāyatopi sabbathā lokaṃ avedi aññāsi paṭivijjhi. Yathāha. Yattha kho āvuso na jāyati na jiyyati na miyyati na cavati na uppajjati nāhantaṃ gamanena lokassantaṃ ñāteyyaṃ diṭṭheyyaṃ patteyyanti vadāmi na cāhaṃ āvuso appatvāva lokassantaṃ dukkhassa antakiriyaṃ vadāmi apicāhaṃ āvuso imasmiṃyeva byāmamatte kalevare sasaññamhi samanake lokañca paññāpemi lokasamudayañca lokanirodhañca lokanirodhagāminiñca paṭipadaṃ

Gamanena na pattabbo lokassanto kudācanaṃ

na ca appatvā lokassantaṃ dukkhā atthi pamocanaṃ.