{4} Evaṃ brāhmaṇo attanā adhippetaṃ arasarūpataṃ āropetuṃ asakkonto athāparaṃ nibbhogo bhavantiādimāha. Sabbapariyāyesu cettha vuttanayeneva yojanākkamaṃ viditvā sandhāya bhāsitamatthaṃ evaṃ veditabbaṃ. Brāhmaṇo tameva vayovuḍḍhānaṃ abhivādanakammādiṃ loke sāmaggīparibhogoti maññamāno tadabhāvena bhagavantaṃ nibbhogoti āha. Bhagavā yvāyaṃ rūpādīsu sattānaṃ chandarāgaparibhogo tadabhāvaṃ attani sampassamāno aparaṃ pariyāyaṃ anujānāti. {5} Puna brāhmaṇo yaṃ loke vayovuḍḍhānaṃ abhivādanādikulasamudācārakammaṃ lokiyā karonti tassa akiriyaṃ sampassamāno bhagavantaṃ akiriyavādoti āha. Bhagavā pana yasmā kāyaduccaritādīnaṃ akiriyaṃ vadati tasmā taṃ akiriyavādaṃ attani sampassamāno aparaṃ pariyāyaṃ anujānāti. Tattha ca kāyaduccaritanti pāṇātipātaadinnādānamicchācāracetanā veditabbā. Vacīduccaritanti musāvādapisuṇāvācapharusavācasamphappalāpacetanā veditabbā. Manoduccaritanti abhijjhābyāpādamicchādiṭṭhiyo veditabbā. Ṭhapetvā te dhamme avasesā akusalā dhammā anekavihitā pāpakā akusalā dhammāti veditabbā. {6} Puna brāhmaṇo tameva abhivādanādikammaṃ bhagavati apassanto imaṃ āgamma ayaṃ lokatanti lokappaveṇi ucchijjatīti maññamāno bhagavantaṃ ucchedavādoti āha. Bhagavā pana yasmā aṭṭha lobhasahagatacittuppādesu pañcakāmaguṇikarāgassa dvīsu akusalacittesu uppajjamānakadosassa ca anāgāmimaggena ucchedaṃ vadati sabbākusalasambhavassa pana niravasesassa mohassa arahattamaggena ucchedaṃ vadati ṭhapetvā te tayo avasesānaṃ pāpakānaṃ akusalānaṃ dhammānaṃ yathānurūpaṃ catūhi maggehi ucchedaṃ vadati tasmā taṃ ucchedavādaṃ attani sampassamāno aparaṃ pariyāyaṃ anujānāti.

{7} Puna brāhmaṇo jigucchati maññe samaṇo gotamo idaṃ vayovuḍḍhānaṃ abhivādanādikulasamudācārakammantena na taṃ karotīti maññamāno bhagavantaṃ jegucchīti āha. Bhagavā pana yasmā jigucchati kāyaduccaritādīhi. Kiṃ vuttaṃ hoti. Yañca tividhaṃ kāyaduccaritaṃ yañca catubbidhaṃ vacīduccaritaṃ yañca tividhaṃ manoduccaritaṃ yā ca ṭhapetvā tāni duccaritāni avasesānaṃ lāmakaṭṭhena pāpakānaṃ akosallasambhūtaṭṭhena akusalānaṃ dhammānaṃ samāpatti samāpajjanā samaṅgibhāvo taṃ sabbampi gūthaṃ viya maṇḍanakajātiyo puriso jigucchati hiriyati. Tasmā taṃ jegucchitaṃ attani sampassamāno aparaṃ pariyāyaṃ anujānāti Tattha kāyaduccaritenāti upayogatthe karaṇavacanaṃ daṭṭhabbaṃ. {8} Puna brāhmaṇo tameva abhivādanādikammaṃ bhagavati apassanto ayaṃ imaṃ lokajeṭṭhakakammaṃ vineti vināseti athavā yasmā etaṃ sāmīcikammaṃ na karoti tasmā ayaṃ vinetabbo niggaṇhitabboti maññamāno bhagavantaṃ venayikoti āha. Tatrāyaṃ padattho. Vinayatīti vinayo vināsetīti vuttaṃ hoti. Vinayoeva venayiko. Vinayaṃ vā arahatīti venayiko. Niggahaṃ arahatīti vuttaṃ hoti. Bhagavā pana yasmā rāgādīnaṃ vinayāya vūpasamāya dhammaṃ deseti tasmā venayiko hoti. Ayameva ettha padattho. Vinayāya dhammaṃ desetīti venayiko. Vicitrā hi taddhitavutti. Svāyantaṃ venayikabhāvaṃ attani sampassamāno aparaṃ pariyāyaṃ anujānāti. {9} Puna brāhmaṇo yasmā abhivādanādīni sāmīcikammāni karontā vayovuḍḍhe tosenti hāsenti akarontā pana tāpenti vihesenti domanassaṃ nesaṃ uppādenti bhagavā ca tāni na karoti tasmā ayaṃ vayovuḍḍhe tappatīti maññamāno sappurisācāravirahitattā vā kapaṇapuriso ayanti maññamāno bhagavantaṃ tapassīti āha. Tatrāyaṃ padattho. Tapatīti tapo roseti vihesetīti vuttaṃ hoti. Sāmīcikammākaraṇassetaṃ nāmaṃ. Tapo assa atthīti tapassī. Dutiye atthavikappe byañjanāni avicāretvā loke kapaṇapuriso tapassīti vuccati. Bhagavā pana ye akusalā dhammā lokaṃ tapanato tapanīyāti vuccanti tesaṃ pahīnattā yasmā tapassīti saṅkhaṃ gato tasmā taṃ tapassitaṃ attani sampassamāno aparaṃ Pariyāyaṃ anujānāti. Tatrāyaṃ padattho. Tapantīti tapā. Akusalānaṃ dhammānametaṃ adhivacanaṃ. Vuttampi hetaṃ idha tappati pecca tappatīti gāthāyaṃ. Te tape assi nirassi pahāsi viddhaṃsesīti tapassī.