Tena kho pana samayena uttarāpathakā assabāṇijā .pe. Assosi kho bhagavā udukkhalasaddanti. Tenāti yasmiṃ samaye bhagavā verañjaṃ upanissāya vassāvāsaṃ upagato tena samayena
Uttarāpathavāsikā uttarāpathato vā āgatattā evaṃladdhavohārā assabāṇijā uttarāpathe assānaṃ uṭṭhānaṭṭhāne pañca assasatāni gahetvā diguṇatiguṇaṃ lābhaṃ paṭṭhayamānā desantaraṃ gacchantā tehi attano vikkāyikabhaṇḍabhūtehi pañcamattehi assasatehi verañjāyaṃ vassāvāsaṃ upagatā honti. Kasmā. Na hi sakkā tasmiṃ dese vassike cattāro māse addhānaṃ paṭipajjituṃ. Upagacchantā ca bahinagare udakena anajjhottharaṇīye ṭhāne attano ca vāsāgārāni assānañca mandiraṃ kārāpetvā vatiyā parikkhipiṃsu. Tāni tesaṃ vasanaṭṭhānāni assamaṇḍalikāyoti paññāyiṃsu. Tenāha tehi assamaṇḍalikāsu bhikkhūnaṃ pattha pattha pulakaṃ paññattaṃ hotīti. Patthapatthapulakanti ekamekassa bhikkhuno patthapatthappamāṇaṃ pulakaṃ. Pattho nāma nāḷīmattaṃ hoti ekassa purisassa alaṃ yāpanāya. Vuttampi hetaṃ patthodano nālamayaṃ duvinnanti. Pulakannāma nitthusaṃ katvā ussedetvā gahitayavataṇḍulā vuccanti. Yadi hi sathusā honti pāṇakā vijjhanti addhānakkhamā na honti tasmā te bāṇijā addhānakkhamaṃ katvā yavataṇḍulaṃ ādāya addhānaṃ paṭipajjanti yattha assānaṃ khādanīyaṃ tiṇaṃ dullabhaṃ bhavissati tattheva taṃ assabhattaṃ bhavissatīti. Kasmā pana tehi taṃ bhikkhūnaṃ paññattanti. Vuccate. Na hi te dakkhiṇāpathamanussā viya assaddhā appasannā. Te pana saddhā pasannā buddhamāmakā dhammamāmakā saṅghamāmakā.
Te pubbaṇhasamayaṃ kenacideva karaṇīyena nagaraṃ pavisantā dve tayo divase addasaṃsu sattaṭṭha bhikkhū sunivatthe supārute iriyāpathasampanne sakalampi nagaraṃ piṇḍāya caritvā kiñci alabhamāne. Disvāna tesaṃ etadahosi ayyā imaṃ nagaraṃ upanissāya vassaṃ upagatā chātakañca vattati na ca kiñci labhanti ativiya kilamanti mayañcamhā āgantukā na sakkoma nesaṃ devasikaṃ yāguñca bhattañca paṭiyādetuṃ amhākaṃ pana assā sāyañca pāto ca dvikkhattuṃ bhattaṃ labhanti yannūna mayaṃ ekamekassa assassa pātarāsabhattato ekamekassa bhikkhuno patthapatthapulakaṃ dadeyyāma evaṃ ayyā na ca kilamissanti assā ca yāpessantīti. Te bhikkhūnaṃ santikaṃ gantvā etamatthaṃ ārocetvā bhante tumhe patthapatthapulakaṃ paṭiggahetvā yaṃ vā taṃ vā katvā paribhuñjathāti yācitvā devasikaṃ patthapatthapulakaṃ paññāpesuṃ. Tena vuttaṃ tehi assamaṇḍalikāsu bhikkhūnaṃ patthapatthapulakaṃ paññattaṃ hotīti. Paññattanti niccabhattasaṅkhepena ṭhapitaṃ.