{32} Aññataraṃ kuḍḍamūlanti tasmiṃ kira padese dānapatīnaṃ gharesu sālā honti āsanāni cettha paññattāni honti upaṭṭhāpitaṃ udakakañjiyaṃ. Tattha pabbajitā piṇḍāya caritvā nisīditvā bhuñjanti. Sace icchanti dānapatīnampi santakaṃ gaṇhanti. Tasmā tampi aññatarassa kulassa īdisāya sālāya aññataraṃ kuḍḍamūlanti veditabbaṃ. Na hi pabbajitā kapaṇamanussā viya asāruppe ṭhāne nisīditvā bhuñjantīti. Atthi nāma tātāti ettha atthīti vijjamānatthe nāmāti pucchanatthe maññanatthe ca nipāto. Idaṃ hi vuttaṃ hoti atthi nukho tāta sudinna amhākaṃ dhanaṃ nanu mayaṃ niddhanāti vattabbā yesaṃ no tvaṃ īdise ṭhāne nisīditvā ābhidosikaṃ kummāsaṃ paribhuñjissasi. Tathā atthi nukho tāta sudinna amhākaṃ jīvitaṃ nanu mayaṃ matāti vattabbā yesaṃ no tvaṃ īdise ṭhāne nisīditvā ābhidosikaṃ kummāsaṃ paribhuñjissasi. Tathā atthi maññe tāta sudinna tava abbhantare sāsanaṃ nissāya paṭiladdho samaṇaguṇo yaṃ tvaṃ subhojanarasasaṃvaḍḍhitopi imaṃ jigucchaneyyaṃ ābhidosikaṃ kummāsaṃ amatamiva nibbikāro paribhuñjissasīti. So pana gahapati dukkhābhitunnatāya etamatthaṃ paripuṇṇaṃ katvā vattumasakkonto atthi nāma tāta sudinna ābhidosikaṃ kummāsaṃ paribhuñjissasīti ettakameva Avoca. Akkharacintakā panettha imaṃ lakkhaṇaṃ vadanti. Anokappanāmarisanatthavasenetaṃ atthisadde upapade parijuñjissasīti anāgatavacanaṃ kataṃ. Tassāyamattho atthi nāma .pe. Paribhuñjissasīti idaṃ paccakkhampi ahaṃ na saddahāmi na marisayāmīti. Tatāyaṃ ābhidosikoti tato tava gehato ayaṃ ābhidosiko kummāso laddhoti attho. Tatoyantipi pāṭho. Tadāyantipi paṭhanti. Taṃ na sundaraṃ. Yena sakapitu nivesananti yena sakassa pitu attano pitu nivesananti attho. Thero pitari pemeneva suvaco hutvā agamāsi. Adhivāsesīti thero ukkuṭṭhapiṇḍapātikopi samāno sace ekabhattampi na gahessāmi ativiya nesaṃ domanassaṃ bhavissatīti ñātīnaṃ anukampāya adhivāsesi. {33} Opuñchāpetvāti upalimpāpetvā. Tirokaraṇīyanti karaṇatthe bhummaṃ. Sāṇipākārena parikkhipitvāti attho. Athavā tiro karonti etenāti tirokaraṇīyaṃ. Taṃ parikkhipitvā samantato katvāti attho. Ekaṃ hiraññassāti ettha hiraññanti kahāpaṇo veditabbo. Purisoti nātidīgho nātirasso majjhimappamāṇo veditabbo. Tena hīti yasmā ajja sudinno āgamissati tena kāraṇena. Hiiti padapūraṇamatte nipāto. Tenāti ayampi vā uyyojanatthe nipātoyeva.