Ticīvarañca patto ca vāsī sūci ca bandhanaṃ

parissāvanenaṭṭhete yuttayogassa bhikkhunoti evaṃ vuttehi aṭṭhahi parikkhārehi sarīre paṭimukkehiyeva vassasatikatthero viya iriyāpathasampanno buddhācariyako buddhūpajjhāyako sammāsambuddhaṃ vandamānoyeva tiṭṭhati. Bhagavā hi paṭhamabodhiyaṃ ekasmiṃ kāle Ehibhikkhuupasampadāyaeva upasampādeti. Evaṃ upasampannāni ca sahassūpari ekacattāḷīsuttarāni tīṇi bhikkhusatāni ahesuṃ. Seyyathīdaṃ. Pañca pañcavaggiyattherā yaso kulaputto tassa parivārā catuppaṇṇāsa sahāyakā tiṃsabhaddavaggiyā sahassapurāṇajaṭilā saddhiṃ dvīhi aggasāvakehi aḍḍhateyyasatā paribbājakā eko aṅgulimālattheroti. Vuttañcetaṃ aṭṭhakathāyaṃ

tīṇi sataṃ sahassañca cattāḷīsaṃ punāpare

eko ca thero sappañño sabbe te ehibhikkhukāti. Na kevalañca ete aññepi bahū santi. Seyyathīdaṃ. Tisataparivāro selo brāhmaṇo sahassaparivāro mahākappino dasasahassā kapilavatthuvāsino kulaputtā soḷasasahassā pārāyanikabrāhmaṇātievamādayo. Te pana vinayapiṭake pāliyaṃ na niddiṭṭhattā na vuttā. Ime tattha niddiṭṭhattā vuttā.