Puthujjanasotāpannasakadāgāmianāgāmisukkhavipassakakhīṇāsavabhikkhū anekasate anekasahasse ca vajjetvā tipiṭakasabbapariyattippabhedadhare paṭisambhidappatte mahānubhāve yebhuyyena bhagavatā etadaggaṃ āropite tevijjādibhede khīṇāsavabhikkhūyeva ekūnapañcasate pariggahesi. Ye sandhāya idaṃ vuttaṃ athakho āyasmā mahākassapo ekenūnapañca- arahantasatāni uccinīti. Kissa pana thero ekenūnamakāsīti. Āyasmato ānandattherassa okāsakaraṇatthaṃ. Tena hāyasmatā sahāpi vināpi na sakkā dhammasaṅgīti kātuṃ. So hāyasmā sekkho sakaraṇīyo tasmā saha na sakkā. Yasmā panassa kiñci dasabaladesitaṃ suttageyyādikaṃ bhagavato asammukhāpaṭiggahitaṃ nāma natthi tasmā vinā na sakkā. Yadi evaṃ sekkhopi samāno dhammasaṅgītiyā bahukārattā therena uccinitabbo assa atha kasmā na uccinitoti. Parūpavādaṃ vivajjanato. Thero hi āyasmante ānande ativiya vissattho ahosi. Tathāhi naṃ sirasmiṃ palitesu jātesupi na vāyaṃ kumārako mattamaññāsīti kumārakavādena vadati. Sakyakulappasūto cāyamāyasmā ānando tathāgatassa bhātā cūḷapituputto tatra hi bhikkhū chandāgamanaṃ viya maññamānā bahū asekkhapaṭisambhidappatte bhikkhū ṭhapetvā ānandaṃ sekkhapaṭisambhidappattaṃ thero uccinīti upavadeyyuṃ taṃ parūpavādaṃ parivajjento ānandaṃ vinā saṅgīti na sakkā kātuṃ bhikkhūnaṃyeva anumatiyā gahessāmīti taṃ na uccini. Atha sayameva bhikkhū ānandassatthāya theraṃ yāciṃsu.
Yathāha. Bhikkhū āyasmantaṃ mahākassapaṃ etadavocuṃ ayaṃ bhante āyasmā ānando kiñcāpi sekkho abhabbo chandā dosā mohā bhayā agatiṃ gantuṃ bahu cānena bhagavato santike dhammo ca vinayo ca pariyatto tenahi bhante thero āyasmantaṃpi ānandaṃ uccinatūti. Athakho āyasmā mahākassapo āyasmantaṃpi ānandaṃ uccini. Evaṃ bhikkhūnaṃ anumatiyā uccinitena tenāyasmatā saddhiṃ pañca therasatāni ahesuṃ. Athakho therānaṃ bhikkhūnaṃ etadahosi kattha nukho mayaṃ dhammañca vinayañca saṅgāyeyyāmāti. Athakho therānaṃ bhikkhūnaṃ etadahosi rājagahaṃ kho mahāgocaraṃ pahutasenāsanaṃ yannūna mayaṃ rājagahe vassaṃ vasantā dhammañca vinayañca saṅgāyeyyāma na aññe bhikkhū rājagahe vassaṃ upagaccheyyunti. Kasmā pana nesaṃ etadahosi. Idaṃ amhākaṃ thāvarakammaṃ koci visabhāgapuggalo saṅghamajjhaṃ pavisitvā ukkoṭeyyāti. Athāyasmā mahākassapo ñattidutiyena kammena sāvesi. Taṃ saṅgītikkhandhake vuttanayeneva ñātabbaṃ.