Tatrāti tesu bhikkhakotiādinā nayena vuttesu bhikkhūsu. Yvāyaṃ bhikkhūti yo ayaṃ bhikkhu. Samaggena saṅghena .pe. Upasampannoti aṭṭhasu upasampadāsu ñatticatuttheneva kammena upasampanno. Ayaṃ imasmiṃ atthe adhippeto bhikkhūti ayaṃ Imasmiṃ methunaṃ dhammaṃ paṭisevitvā pārājiko hotīti atthe bhikkhūti adhippeto. Itare pana bhikkhakotiādayo atthuddhāravasena vuttā. Tesu ca bhikkhakotiādayo niruttivasena vuttā. Samaññāya bhikkhu paṭiññāya bhikkhūti ime dve abhilāpavasena vuttā. Ehibhikkhūti buddhena upajjhāyena paṭiladdhaupasampadāvasena vuttā. Saraṇagamanabhikkhu anuppannāya kammavācāya upasampannavasena vutto. Bhadrotiādayo guṇavasena vuttāti veditabbā.
Idāni bhikkhūnanti imaṃ padaṃ visesatthābhāvato avibhajitvāva yaṃ sikkhañca sājīvañca samāpannattā bhikkhūnaṃ sikkhāsājīvasamāpanno hoti taṃ dassento sikkhātiādimāha. Tattha sikkhitabbāti sikkhā. Tissoti gaṇanaparicchedo. Adhisīlasikkhāti adhikaṃ uttamaṃ sīlanti adhisīlaṃ. Adhisīlañca taṃ sikkhitabbato sikkhā cāti adhisīlasikkhā. Esa nayo adhicittaadhipaññāsikkhāsu.
Katamaṃ panettha sīlaṃ katamaṃ adhisīlaṃ katamaṃ cittaṃ katamaṃ adhicittaṃ katamā paññā katamā adhippaññāti. Vuccate. Pañcaṅgadasaṅgasīlantāva sīlameva. Taṃ hi buddhe uppannepi anuppannepi loke pavattati. Uppanne buddhe tasmiṃ sīle buddhāpi sāvakāpi mahājanaṃ samādapenti. Anuppanne buddhe paccekabuddhā ca kammavādino dhammikā samaṇabrāhmaṇā ca cakkavattī ca mahārājā mahābodhisattā ca samādapenti. Sāmampi paṇḍitā samaṇabrāhmaṇā samādiyanti. Te taṃ kusalakammaṃ paripūretvā Devesu ca manussesu ca sampattiṃ anubhonti. Pāṭimokkhasaṃvarasīlaṃ pana adhisīlanti vuccati. Taṃ hi suriyo viya pajjotānaṃ sineru viya pabbatānaṃ sabbalokiyasīlānaṃ adhikañceva uttamañca buddhuppāde eva ca pavattati na vinā buddhuppādā. Na hi taṃ paññattiṃ uddharitvā añño satto ṭhapetuṃ sakkoti. Buddhā eva pana sabbaso kāyavacīdvāraajjhācārasotaṃ chinditvā tassa tassa vītikkamassa anucchavikaṃ taṃ sīlasaṃvaraṃ paññāpentīti. Pāṭimokkhasaṃvaratopica maggaphalasampayuttameva sīlaṃ adhisīlaṃ. Taṃ pana idha anadhippetaṃ. Na hi taṃsamāpanno bhikkhu methunaṃ dhammaṃ paṭisevati. Kāmāvacarāni aṭṭha kusalacittāni lokiyaaṭṭhasamāpatticittāni ca ekajjhaṃ katvā cittamevāti veditabbāni. Buddhuppādānuppāde cassa pavatti samādapanaṃ samādānañca sīle vuttanayeneva veditabbaṃ. Vipassanāpādakaṃ aṭṭhasamāpatticittaṃ pana adhicittanti vuccati. Taṃ hi adhisīlaṃ viya sīlānaṃ sabbalokiyacittānaṃ adhikañceva uttamañca buddhuppāde eva ca hoti na vinā buddhuppādā. Tatopi ca maggaphalacittameva adhicittaṃ. Taṃ pana idha anadhippetaṃ. Na hi taṃsamāpanno bhikkhu methunaṃ dhammaṃ paṭisevati. Atthi dinnaṃ atthi yiṭṭhantiādinayappavattaṃ pana kammassakatāñāṇaṃ paññā. Sā hi buddhe uppannepi anuppannepi loke pavattati. Uppanne buddhe tassā paññāya buddhāpi sāvakāpi mahājanaṃ samādapenti. Anuppanne buddhe paccekabuddhā kammavādino ca dhammikā samaṇabrāhmaṇā Cakkavattī ca mahārājā mahābodhisattā ca samādapenti. Sāmampi paṇḍitā sattā samādiyanti. Tathā hi aṅkuro dasavassasahassāni mahādānaṃ adāsi. Velāmo vessantaro aññe ca bahū paṇḍitamanussā mahādānāni adaṃsu. Te taṃ kusaladhammaṃ paripūretvā devesu ca manussesu ca sampattiṃ anubhaviṃsu. Tilakkhaṇākāraparicchedakaṃ pana vipassanāñāṇaṃ adhippaññāti vuccati. Sā hi adhisīlaadhicittāni viya sīlacittānaṃ sabbalokiyappaññānaṃ adhikāceva uttamā ca na vinā buddhuppādā loke pavattati. Tatopi ca maggaphalappaññāva adhippaññā. Sā pana idha anadhippetā. Na hi taṃsamāpanno bhikkhu methunaṃ dhammaṃ paṭisevatīti.