pārājikanti yaṃ vuttaṃ taṃ suṇāhi yathākathaṃ

cuto paraddho bhaṭṭho ca saddhammā hi niraṅkato

saṃvāsopi tahiṃ natthi tenetaṃ iti vuccatīti vuttaṃ. Ayaṃ hettha attho taṃ sikkhāpadaṃ vītikkamanto āpattiñca āpanno puggalo cuto hotīti sabbaṃ yojetabbaṃ. Tena vuccatīti yena kāraṇena assamaṇo hoti asakyaputtiyo paribhaṭṭho chinno parājito sāsanato tena vuccati. Kinti. Pārājiko hotīti. Saha vasanti etthāti saṃvāso. Taṃ dassetuṃ saṃvāso nāmāti vatvā ekakammantiādimāha. Tatrāyaṃ saddhiṃ yojanāya saṃvaṇṇanā. Catubbidhaṃpi saṅghakammaṃ sīmāparicchinnehi pakatattehi Bhikkhūhi ekato kattabbattā ekakammaṃ nāma. Tathā pañcavidhopi pāṭimokkhuddeso ekato uddisitabbattā ekuddeso nāma. Paññattaṃ pana sikkhāpadaṃ sabbehipi lajjipuggalehi samaṃ sikkhitabbabhāvato samasikkhātā nāma. Ettha yasmā sabbepi lajjino etesu kammādīsu saha vasanti na ekopi tato bahiddhā sandissati tasmā tāni sabbānipi gahetvā eso saṃvāso nāmāti āha. So ca vuttappakāro saṃvāso tena puggalena saddhiṃ natthi tena kāraṇena pārājiko puggalo asaṃvāsoti vuccatīti.