Evaṃ mūlacchejjavasena daḷhaṃ katvā dutiyapārājike paññatte aparampi anuppaññattatthāya rajakabhaṇḍikavatthu udapādi. Tassuppattidīpanatthametaṃ vuttaṃ evañcidaṃ bhagavatā bhikkhūnaṃ sikkhāpadaṃ paññattaṃ hotīti. Tassattho ca anuppaññattisambandho ca paṭhamapārājikavaṇṇanāyaṃ vuttanayeneva veditabbo. Yathā ca idha evaṃ ito paraṃ sabbasikkhāpadesu. Yaṃyaṃ hi pubbe vuttaṃ taṃtaṃ sabbaṃ vajjetvā uparūpari apubbameva vaṇṇayissāma. Yadi hi Yaṃyaṃ vuttanayaṃ taṃtaṃ punapi vaṇṇayissāma kadā vaṇṇanāya antaṃ gamissāma. Tasmā yaṃyaṃ pubbe vuttaṃ taṃtaṃ sabbaṃ sādhukaṃ upalakkhetvā tattha tattha attho ca yojanā ca veditabbā. Apubbaṃ pana yaṅkiñci anuttānatthaṃ sabbaṃ mayameva vaṇṇayissāma.