Evaṃ vatthu oloketabbaṃ.

Kāloti avahārakālo. Tadeva hi bhaṇḍaṃ kadāci samagghaṃ hoti kadāci mahagghaṃ. Tasmā taṃ bhaṇḍaṃ yasmiṃ kāle avahaṭaṃ tasmiṃyeva kāle yo tassa aggho hoti tena agghena āpatti Kāretabbā. Evaṃ kālo oloketabbo.

Desoti avahāradeso. Taṃ hi bhaṇḍaṃ yasmiṃ dese avahaṭaṃ tasmiṃyeva dese yo tassa aggho hoti tena agghena āpatti kāretabbā. Bhaṇḍaṭṭhānadese hi bhaṇḍaṃ samagghaṃ hoti aññattha mahagghaṃ hoti.

Imassāpi ca atthassa dīpanatthamidaṃ vatthu. Antarasamudde kira eko bhikkhu susaṇṭhānaṃ nāḷikeraṃ labhitvā bhamaṃ āropetvā saṅkhathālakasadisaṃ manoramaṃ pānīyathālakaṃ katvā tattheva ṭhapetvā cetiyagiriṃ agamāsi. Athañño bhikkhu antarasamuddaṃ gantvā tasmiṃ vihāre paṭivasanto taṃ thālakaṃ disvā theyyacittena gahetvā cetiyagirimeva āgato. Tassa tattha yāguṃ pivantassa taṃ thālakaṃ disvā thālakassāmiko bhikkhu āha kuto te idaṃ laddhanti. Antarasamuddato me ānītanti. So netaṃ tava santakaṃ theyyāya te gahitanti saṅghamajjhaṃ ākaḍḍhi. Tattha vinicchayaṃ alabhitvā mahāvihāraṃ āgamiṃsu. Tattha bheriṃ paharāpetvā mahācetiyasamīpe sannipātaṃ katvā vinicchayaṃ ārabhiṃsu. Vinayadharattherā avahāraṃ paññāpesuṃ. Tasmiñca sannipāte ābhidhammikagodattatthero nāma vinayakusalo hoti. So evamāha iminā idaṃ thālakaṃ kuhiṃ avahaṭanti. Antarasamudde avahaṭanti. Tatrīdaṃ kiṃ agghatīti. Na kiñci agghati. Tatra hi nāḷikeraṃ bhinditvā miñjaṃ khāditvā kapālaṃ chaḍḍenti dāruatthaṃ pana pharatīti. Imassa bhikkhuno Ettha hatthakammaṃ kiṃ agghatīti. Māsakaṃ vā ūnamāsakaṃ vāti. Atthi pana katthaci sammāsambuddhena māsake vā ūnamāsake vā pārājikaṃ paññattanti. Evaṃ vutte sādhu sādhu sukathitaṃ suvinicchitanti ekasādhukāro ahosi. Tena ca samayena bhātiyarājāpi cetiyavandanatthaṃ nagarato nikkhanto taṃ saddaṃ sutvā kiṃ idanti pucchitvā sabbaṃ paṭipāṭiyā sutvā nagare bheriñcārāpesi mayi sante bhikkhūnampi bhikkhunīnampi gihīnampi adhikaraṇaṃ ābhidhammikagodattattherena vinicchitaṃ suvinicchitaṃ tassa vinicchaye atiṭṭhamānaṃ rājāṇāya ṭhapemīti.