Evaṃ deso oloketabbo.

Agghoti bhaṇḍaggho. Navabhaṇḍassa hi yo aggho hoti so pacchā parihāyati. Yathā navadhoto patto aṭṭha vā dasa vā agghati so pacchā chiddo vā āṇigaṇḍikāhato vā appaggho hoti. Tasmā na sabbadā bhaṇḍaṃ pakatiaggheneva kātabbanti. Evaṃ aggho oloketabbo.

Paribhogoti bhaṇḍaparibhogo. Paribhogenāpi hi vāsīādibhaṇḍassa aggho parihāyati. Tasmā evaṃ upaparikkhitabbaṃ. Sace koci kassaci pādagghanakaṃ vāsiṃ harati tatra vāsīsāmiko pucchitabbo tayā ayaṃ vāsī kittakena kītāti. Pādena bhanteti. Kiṃ pana te kīṇitvāva ṭhapitā udāhu naṃ valañjesīti. Sace vadati ekadivasaṃ me dantakaṭṭhaṃ vā rajanacchalliṃ vā pattapacanakadāruṃ vā Chinnā ghaṃsitvā vā nisitāti athassa porāṇo aggho bhaṭṭhoti veditabbo. Yathā ca vāsiyā evaṃ añjaniyā vā añjanīsalākāya vā kuñcikāya vā palāsena vā thusehi vā iṭṭhakacuṇṇena vā ekavāraṃ ghaṃsitvā dhovanamattenāpi aggho bhassati. Tipumaṇḍalassa makaradantacchedenāpi majjanamattenāpi udakasāṭikāya sakiṃ nivāsanapārupanenāpi paribhogasīsena aṃse vā sīse vā ṭhapanamattenāpi taṇḍulādīnaṃ papphoṭanenāpi tato ekaṃ vā dve vā apanayanenāpi antamaso ekaṃ pāsāṇasakkharaṃ uddharitvā chaḍḍitamattenāpi sappitelādīnaṃ bhājanantaraparivattanenāpi antamaso tato makkhikaṃ vā kipīlikaṃ vā uddharitvā chaḍḍitamattenāpi guḷapiṇḍakassa madhurabhāvajānanatthaṃ nakhena vijjhitvā anumattaggahitamattenāpi aggho bhassati. Tasmā yaṅkiñci pādagghanakaṃ vuttanayeneva sāmikehi paribhogena ūnaṃ kataṃ hoti na taṃ avahaṭo bhikkhu pārājikena kāretabbo. Evaṃ paribhogo oloketabbo.

Evaṃ imāni tulayitvā pañca ṭhānāni dhāreyyatthaṃ vicakkhaṇo āpattiṃ vā anāpattiṃ vā garukaṃ vā lahukaṃ vā āpattiṃ yathāṭhāne ṭhapeyyāti.