Ārāmaṭṭhakathā niṭṭhitā.

{103} Vihāraṭṭhepi. Catūhi ṭhānehi nikkhittaṃ vuttanayameva. Abhiyogepi cettha cātuddisasaṅghaṃ uddissa bhikkhūnaṃ dinnaṃ vihāraṃ vā pariveṇaṃ vā āvāsaṃ vā mahantampi khuddakampi abhiyuñjato abhiyogo na ruhati acchinditvā gaṇhitumpi na sakkoti. Kasmā. Sabbesaṃ dhuranikkhepābhāvato. Na hettha sabbe cātuddisā bhikkhū dhuranikkhepaṃ karontīti. Dīghabhāṇakādibhedassa pana gaṇassa vā ekapuggalassa vā santakaṃ abhiyuñjitvā gaṇhanto sakkoti te dhuraṃ nikkhipāpetuṃ. Tasmā tattha ārāme vuttanayeneva vinicchayo veditabbo.

Vihāraṭṭhakathā niṭṭhitā.

{104} Khettaṭṭhepi. Khettaṃ tāva dassento khettannāma yattha pubbannaṃ vā aparannaṃ vā jāyatīti āha. Tattha pubbannanti sāliādīni satta dhaññāni. Aparannanti muggamāsādīni. Ucchukkhettādikampi ettheva saṅgahitaṃ. Idhāpi catūhi ṭhānehi nikkhittaṃ vuttanayameva. Tattha jātake pana sālisīsādīni nirappitvā vā ekamekaṃ hattheneva chinditvā vā asitena lāyitvā vā bahūni ekato uppāṭetvā vā gaṇhantassa yasmiṃ bīje vā sīse vā muṭṭhiyaṃ vā muggamāsādiphale vā vatthu pūrati tasmiṃ bandhanā mocitamatte pārājikaṃ. Acchijjamāno pana daṇḍako vā vāko vā taco vā appamattakopi rakkhati. Vīhināḷaṃ dīghampi hoti yāva anto nāḷato vīhisīsadaṇḍako na nikkhamati tāva rakkhati. Kesaggamattampi nāḷato daṇḍakassa heṭṭhimatale nikkhante bhaṇḍagghavasena kāretabbo. Asitena lāyitvā gaṇhato pana muṭṭhigatesu heṭṭhā chinnesupi sace sīsāni jaṭitāni rakkhanti tāva. Vijaṭetvā pana kesaggamattampi ukkhipato sace vatthu pūrati pārājikaṃ. Sāmikehi pana lāyitvā ṭhapitaṃ sabhusaṃ vā abhusaṃ vā katvā gaṇhato yena vatthu pūrati tasmiṃ gahite pārājikaṃ. Sace parikappeti idaṃ madditvā papphoṭetvā sārameva gaṇhissāmīti rakkhati tāva. Maddanapapphoṭanesu ṭhānā cāventassāpi pārājikaṃ natthi . Pacchā bhājanagate katamatte pārājikaṃ. Abhiyogo panettha vuttanayoeva. Khīlasaṅkamanādīsu paṭhavī nāma anagghā tasmā sace ekeneva khīlena kesaggamattampi paṭhavippadesaṃ sāmikānaṃ passantānaṃ vā apassantānaṃ vā attano santakaṃ karoti tasmiṃ khīle nāmaṃ chinditvā vā acchinditvā vā saṅkāmitamatte tassa ca ye cassa ekacchandā sabbesaṃ pārājikaṃ. Sace pana dvīhi khīlehi gahetabbaṃ hoti paṭhame khīle thullaccayaṃ dutiye pārājikaṃ. Sace tīhi gahetabbaṃ hoti paṭhame dukkaṭaṃ dutiye thullaccayaṃ tatiye pārājikaṃ. Evaṃ bahukesupi avasāne dve ṭhapetvā purimehi dukkaṭaṃ avasāne dvinnaṃ ekena thullaccayaṃ itarena pārājikaṃ veditabbaṃ. Tañcakho sāmikānaṃ dhuranikkhepena. Evaṃ sabbattha. Rajjuṃ vāti mama santakaṃ idanti ñāpetukāmo rajjuṃ vā pasāreti yaṭṭhiṃ vā pāteti