{118} Ocaratīti ocarako. Tattha tattha anto anupavisatīti vuttaṃ hoti. Ocaritvāti sallakkhetvā upadhāretvāti attho. Ācikkhatīti parakulesu vā vihārādīsu vā duṭṭhapitaṃ asaṃvihitārakkhaṃ bhaṇḍaṃ aññassa corakammaṃ kātuṃ paṭibalassa āroceti. Āpatti ubhinnaṃ pārājikassāti avassaṃ hāriye bhaṇḍe ocarakassa āṇattikkhaṇe itarassa ṭhānā cāvaneti evaṃ āpatti ubhinnaṃ pārājikassa. Yo pana bhikkhu puriso gehe natthi bhaṇḍaṃ amukannāma padese ṭhapitaṃ asaṃvihitārakkhaṃ dvāraṃ asaṃvutaṃ gatamaggeneva sakkā harituṃ natthi nāma koci purisakārupajīvī yo taṃ gantvā hareyyātiādinā nayena pariyāyaṃ karoti. Tañca sutvā añño ahaṃ dāni harissāmīti gantvā harati. Tassa ṭhānā cāvane pārājikaṃ. Itarassa pana anāpatti. Pariyāyena hi adinnādānato muccatīti.

Ocarakakathā niṭṭhitā.

Oṇiṃ rakkhatīti oṇirakkho. Yo parena attano vasanaṭṭhāne ābhaṭaṃ bhaṇḍaṃ idaṃ tāva bhante muhuttaṃ oloketha yāva ahaṃ idannāma kiccaṃ katvā āgacchāmīti vutto rakkhati tassetaṃ adhivacanaṃ. Tenevāha oṇirakkho nāma āhaṭaṃ bhaṇḍaṃ gopentoti. Tattha oṇirakkho yebhuyyena bandhitvā lañcetvā ṭhapitabhaṇḍaṃ amocetvāva heṭṭhā pasibbakaṃ vā puṭakaṃ vā chinditvā kiñcimattaṃ gahetvā sibbanādiṃ puna pākatikaṃ karoti. Evaṃ gaṇhissāmīti āmasanādīni karontassa anurūpā āpattiyo veditabbāti.

Oṇirakkhakathā niṭṭhitā.