Saṃvidhāya avahāro saṃvidhāvahāro. Aññamaññaṃ saññattiyā katāvahāroti vuttaṃ hoti. Saṃvidahitvāti ekacchandatāya ekajjhāsayatāya sammantayitvāti attho. Tatrāyaṃ vinicchayo. Sambahulā bhikkhū asukannāma gehaṃ gantvā chadanaṃ vā bhittiṃ vā bhinditvā sandhiṃ vā chinditvā bhaṇḍaṃ harissāmāti saṃvidahitvā gacchanti. Tesu eko bhaṇḍaṃ avaharati. Tassuddhāre sabbesaṃ pārājikaṃ. Parivārepi cetaṃ vuttaṃ
caturo janā saṃvidhāya garubhaṇḍaṃ avaharuṃ
tayo pārājikā eko na pārājiko
pañhā mesā kusalehi cintitāti tassāyaṃ attho cattāro janā ācariyantevāsikā chammāsakaṃ garubhaṇḍaṃ avaharitukāmā jātā. Tattha ācariyo tvaṃ ekaṃ māsakaṃ hara Tvaṃ ekaṃ tvaṃ ekaṃ ahaṃ tayo harissāmīti āha. Antevāsikesu pana paṭhamo tumhe bhante tayo haratha tvaṃ ekaṃ hara tvaṃ ekaṃ hara ahaṃ ekaṃ harissāmīti āha. Itarepi dve evameva āhaṃsu. Tattha antevāsikesu ekamekassa eko māsako sāhatthiko hoti. Tena tesaṃ dukkaṭāpattiyo. Pañca āṇattikā. Tehi tiṇṇampi pārājikaṃ. Ācariyassa pana tayo sāhatthikā. Tehissa thullaccayaṃ. Tayo āṇattikā. Tehipi thullaccayameva. Imasmiṃ hi adinnādānasikkhāpade sāhatthikaṃ vā āṇattiyassa āṇattiyaṃ vā sāhatthikassa aṅgaṃ na hoti. Sāhatthiyampana sāhatthiyeneva kāretabbaṃ. Āṇattiyaṃ āṇattiyeneva. Teneva vuttaṃ caturo janā saṃvidhāya .pe. Pañhā mesā kusalehi cintitāti. Apica saṃvidhāvahāre asammohatthaṃ ekabhaṇḍaṃ ekaṭṭhānaṃ ekabhaṇḍaṃ nānāṭhānaṃ nānābhaṇḍaṃ ekaṭṭhānaṃ nānābhaṇḍaṃ nānāṭhānanti idaṃpi catukkaṃ atthato sallakkhetabbaṃ. Tattha ekabhaṇḍaṃ ekaṭṭhānanti ekakulassa āpaṇaphalake pañcamāsakaṃ bhaṇḍaṃ duṭṭhapitaṃ disvā sambahulā ekaṃ āṇāpenti gacchetaṃ āharāti. Tassuddhāre sabbesaṃ pārājikaṃ. Ekabhaṇḍaṃ nānāṭhānanti ekakulassa pañcasu āpaṇaphalakesu ekekaṃ māsakaṃ duṭṭhapitaṃ disvā sambahulā ekaṃ āṇāpenti gacchete āharāti. Pañcamassa māsakassa uddhāre sabbesaṃ pārājikaṃ. Nānābhaṇḍaṃ ekaṭṭhānanti bahūnaṃ santakaṃ pañcamāsakaṃ vā atirekapañcamāsakaṃ vā agghanakaṃ bhaṇḍaṃ ekasmiṃ Ṭhāne duṭṭhapitaṃ disvā sambahulā ekaṃ āṇāpenti gacchetaṃ āharāti. Tassuddhāre sabbesaṃ pārājikaṃ. Nānābhaṇḍaṃ nānāṭhānanti pañcannaṃ kulānaṃ pañcasu āpaṇaphalakesu ekekaṃ māsakaṃ duṭṭhapitaṃ disvā sambahulā ekaṃ āṇāpenti gacchete āharāti. Pañcamassa māsakassa uddhāre sabbesaṃ pārājikanti.