Petapariggaheti ettha pana pittivisaye uppannāpi kālaṃ katvā tasmiṃyeva attabhāve nibbattāpi cātummahārājikādayopi devā sabbe petātveva saṅkhyaṃ gatā tesaṃ pariggahe anāpatti. Sacepi hi sakko devarājā āpaṇaṃ pasāretvā nisinno hoti dibbacakkhuko ca bhikkhu taṃ ñatvā attano cīvaratthāya satasahassagghanakampi sāṭakaṃ tassa mā gaṇha mā gaṇhāti viravantassāpi gahetvā gacchati vaṭṭati. Devatā pana uddissa balikammaṃ karontehi rukkhādīsu laggitasāṭake vattabbameva natthi. Tiracchānagatapariggaheti tiracchānagatānampi pariggahe anāpatti. Sacepi hi nāgarājā vā supaṇṇamāṇavako vā manussarūpena āpaṇaṃ pasāreti tato cassa santakaṃ koci bhikkhu purimanayeneva gahetvā gacchati vaṭṭati. Sīho vā bayaggho vā migamahisādayo vadhitvā akhādanto jighacchāpīḷito āditova na vāretabbo anatthampi hi kareyya. Yadi pana thoke khāyite vāretuṃ sakkoti vāretvā gahetuṃ vaṭṭati. Senādayopi āmisaṃ gahetvā gacchante pātāpetvā gaṇhituṃ vaṭṭati. Paṃsukūlasaññissāti assāmikaṃ idaṃ paṃsukūlanti evaṃ saññissāpi gahaṇe anāpatti. Sace pana taṃ sassāmikaṃ hoti āharāpente dātabbaṃ. Ummattakassāti pubbe vuttappakārassa ummattakassāpi anāpatti. Ādikammikassāti idha dhaniyo ādikammiko tassa anāpatti. Avasesānaṃ pana rajakabhaṇḍikādicorānaṃ chabbaggiyādīnaṃ āpattiyevāti.

Padabhājanīyavaṇṇanā niṭṭhitā.

Samuṭṭhānañca kiriyā atho saññā sacittakaṃ

lokavajjañca kammañca kusalaṃ vedanāya cāti