{142-143} Odaniyagharādivatthūsu. Odaniyagharannāma vikkāyikabhattapacanagharaṃ. Sūnāgharannāma vikkāyikamaṃsapacanagharaṃ. Pūvagharannāma vikkāyikakhajjakapacanagharaṃ. Sesamettha parikkhāravatthūsu pākaṭameva. {144} Pīṭhavatthusmiṃ. So bhikkhu parikappetvā etaṃ ṭhānaṃ sampattaṃ gaṇhissāmīti saṅkāmeti. Tenassa saṅkamane avahāro natthi. Saṅkāmetvā pana parikappitokāsato gahaṇe pārājikaṃ vuttaṃ. Evaṃ haranto ca yadi pīṭhake theyyacittaṃ natthi thavikaṃ agghāpetvā kāretabbo. Atha pīṭhakepi atthi ubho agghāpetvā kāretabbo. Bhisīādīni tīṇi vatthūni pākaṭāneva. {146} Vissāsaggāhādīsu tīsu vatthūsu gahaṇe anāpatti āharāpentesu bhaṇḍadeyyaṃ. Piṇḍāya paviṭṭhassa paṭiviso antoupacārasīmāya ṭhitasseva gahetuṃ vaṭṭati. Yadi pana dāyakā bahiupacāraṭṭhānampi bhante gaṇhātha āgantvā paribhuñjissantīti vadanti evaṃ antogāmaṭṭhānampi gahetuṃ vaṭṭati. Sesamettha uttānatthameva.
{148-149} Sattasu ambacorādīsu vatthūsu. Paṃsukūlasaññāya gahaṇe anāpatti āharāpentesu bhaṇḍadeyyaṃ. Theyyacittena paribhoge pārājikaṃ. Tatrāyaṃ vinicchayo. Sāmikāpi sālayā corāpi Sālayā paṃsukūlasaññāya khādantassa bhaṇḍadeyyaṃ. Theyyacittena gaṇhato uddhāreyeva avahāro bhaṇḍaṃ agghāpetvā kāretabbo. Sāmikā sālayā corā nirālayā eseva nayo. Sāmikā nirālayā corā sālayā puna gaṇhissāmāti kismiñcideva gahanaṭṭhāne khipitvā gatā eseva nayo. Ubho nirālayā paṃsukūlasaññāya khādato anāpatti. Theyyacittena dukkaṭaṃ. Saṅghassa ambādīsu pana. Saṅghārāme jātaṃ vā hotu ānetvā dinnaṃ vā pañcamāsakaṃ vā atirekapañcamāsakaṃ vā agghanakaṃ avaharantassa pārājikaṃ. Paccante corūpaddavena gāmesu vuṭṭhahantesu bhikkhū vihāre chaḍḍetvā puna āvasante janapade āgamissāmāti saussāhāva gacchanti. Bhikkhū tādisaṃ vihāraṃ patvā ambapakkādīni chaḍḍitakānīti paṃsukūlasaññāya paribhuñjanti anāpatti. Theyyacittena paribhuñjato avahāro hoti bhaṇḍaṃ agghāpetvā kāretabbo. Mahāpaccariyaṃ pana saṅkhepaṭṭhakathāyañca avisesena vuttaṃ chaḍḍitavihāre phalāphalaṃ theyyacittena paribhuñjato na pārājikaṃ kasmā āgatāgatānaṃ santakattāti. Gaṇasantake pana puggalike ca saussāhamattameva pamāṇaṃ. Sace pana tato ambapakkādiṃ kulasaṅgaṇhaṇatthāya deti kuladūsakadukkaṭaṃ. Theyyacittena dento agghena kāretabbo. Saṅghikepi eseva nayo. Senāsanatthāya niyamitaṃ kulasaṅgaṇhaṇatthāya dadato dukkaṭaṃ issaravatāya thullaccayaṃ theyyacittena pārājikaṃ. No ce vatthu pahoti agghena Kāretabbo. Bahiupacārasīmāyaṃ nisīditvā issaravatāya paribhuñjato gīvā. Gaṇḍiṃ paharitvā kālaṃ ghosetvā mayhaṃ pāpuṇātīti khāditaṃ sukhāditaṃ. Gaṇḍiṃ apaharitvā kālameva ghosetvā gaṇḍimeva paharitvā kālaṃ aghosetvā gaṇḍimpi apaharitvā kālampi aghosetvā aññesaṃ natthibhāvaṃ ñatvā mayhaṃ pāpuṇātīti khāditaṃpi sukhāditameva.