Gantvā paṭhamameva palāpentassa avahāro natthi. Yopi baddhasūkarassa ghāsañca pānīyañca datvā balaṃ gāhāpetvā ukkuṭṭhiṃ karoti utrāsto palāyissatīti so ce palāyati pārājikaṃ. Pāsaṃ dubbalaṃ katvā ukkuṭṭhisaddena palāpentassāpi eseva nayo. Yo pana ghāsañca pānīyañca datvā gacchati balaṃ gahetvā palāyissatīti so ce palāyati bhaṇḍadeyyaṃ. Pāsaṃ dubbalaṃ katvā gacchantassāpi eseva nayo. Pāsasantike satthaṃ vā aggiṃ vā ṭhapeti chinne vā daḍḍhe vā palāyissatīti. Sūkaro pāsaṃ cālento chinne vā daḍḍhe vā palāyati bhaṇḍadeyyameva. Pāsaṃ yaṭṭhiyā saha pāteti pacchā sūkaro taṃ maddanto gacchati bhaṇḍadeyyaṃ. Sūkaro adduhalapāsāṇehi akkanto hoti. Taṃ palāpetukāmassa adduhalaṃ kāruññena ukkhipato bhaṇḍadeyyaṃ theyyacittena pārājikaṃ. Sace ukkhittamatte agantvā pacchā gacchati bhaṇḍadeyyameva. Ukkhipitvā ṭhapitaṃ adduhalaṃ pāteti pacchā sūkaro taṃ maddanto gacchati bhaṇḍadeyyaṃ. Opāte patitaṃ sūkarampi kāruññena uddharato bhaṇḍadeyyaṃ theyyacittena pārājikaṃ. Opātaṃ pūretvā nāseti pacchā sūkaro taṃ maddanto gacchati bhaṇḍadeyyaṃ. Sūlena viddhaṃ kāruññena uddharati bhaṇḍadeyyaṃ theyyacittena pārājikaṃ. Sūlaṃ uddharitvā chaḍḍeti bhaṇḍadeyyaṃ. Vihārabhūmiyaṃ pana pāse vā adduhalaṃ vā oḍentā vāretabbā migarūpānaṃ paṭissaraṇaṭṭhānametaṃ mā idha evaṃ karothāti. Sace harāpetha bhanteti vadanti harāpetuṃ vaṭṭati. Atha sayaṃ haranti sundarameva. Atha neva haranti na harāpetuṃ denti rakkhaṃ yācitvā harāpetuṃ vaṭṭati. Manussā sassarakkhaṇakāle khettesu pāse ca adduhalādīni ca karonti maṃsaṃ khādantā sassāni rakkhissāmāti. Vītivatte sassakāle tesu anālayesu pakkantesu tattha baddhaṃ vā patitaṃ vā mocetuṃ vaṭṭati. Migavatthudvayepi sūkaravatthūsu vuttasadisoyeva vinicchayo. Macchavatthudvayepi eseva nayo. Ayaṃ pana viseso. Kuminamukhaṃ vivaritvā pacchā puṭakaṃ muñcitvā vā passe chiddaṃ katvā vā kuminato macche pothetvā palāpentassa pārājikaṃ. Bhattasitthāni dassetvāeva palāpentassāpi pārājikaṃ. Saha kuminena uddharato pārājikaṃ. Kevalaṃ kuminamukhaṃ vivarati pacchā puṭakaṃ muñcati chiddaṃ vā karoti macchā pana attano dhammatāya palāyanti bhaṇḍadeyyaṃ. Evaṃ katvā bhattasitthāni dasseti macchā gocaratthāya nikkhamitvā palāyanti bhaṇḍadeyyameva. Mukhaṃ vivaritvā pacchā puṭakaṃ amuñcitvā passe chiddaṃ akatvā kevalaṃ bhattasitthāni dasseti macchā pana chātajjhattā sīsena paharitvā okāsaṃ katvā gocaratthāya nikkhamitvā palāyanti bhaṇḍadeyyameva. Tucchakuminassa mukhaṃ vā vivarati pacchā puṭakaṃ vā muñcati chindaṃ vā karoti āgatāgatā macchā dvārappattā puṭakachiddehi palāyanti bhaṇḍadeyyameva. Tucchakuminaṃ gahetvā gumbe khipati bhaṇḍadeyyamevāti.