Yāne bhaṇḍaṃ pīṭhe thavikāya sadisaṃ. Maṃsapesīvatthumhi. Sace ākāse gaṇhāti gahitaṭṭhānameva ṭhānaṃ. Taṃ chahākārehi paricchinditvā ṭhānā cāvanaṃ veditabbaṃ. Sesamettha dārugopālaka- rajakasāṭakavatthūsu ca ambacorakādivatthunayena vinicchinitabbaṃ.
{155} Kumbhīvatthusmiṃ. Yo sappitelādīni apādagghanakāni gahetvā na puna evaṃ karissāmīti saṃvare ṭhatvā dutiyadivasādīsupi puna citte uppanne evameva dhuranikkhepaṃ katvā paribhuñjanto sabbampi taṃ paribhuñjati nevatthi pārājikaṃ dukkaṭaṃ vā thullaccayaṃ vā āpajjati bhaṇḍadeyyaṃ pana hoti. Ayampi bhikkhu evameva akāsi. Tena vuttaṃ anāpatti bhikkhu pārājikassāti. Dhuranikkhepaṃ pana akatvā divase divase paribhuñjissāmīti taṃ thokaṃ thokampi paribhuñjato yasmiṃ divase pādagghanakaṃ pūrati tasmiṃ pārājikaṃ. Saṃvidhāvahāravatthūni saṃvidhāvahāre muṭṭhivatthūni odaniyagharādivatthūsu dve vighāsavatthūni ambacorādivatthūsu vuttavinicchayanayena veditabbāni. Dve tiṇavatthūni uttānatthāneva.
{156} Ambabhājāpanādivatthūsu. Te bhikkhū ekaṃ gāmakāvāsaṃ paricchinnabhikkhukaṃ agamaṃsu. Tattheva bhikkhū phalāphalaṃ paribhuñjamānāpi tesu āgatesu therānaṃ phalāni dethāti kappiyakārake na avocuṃ. Atha te bhikkhū kiṃ saṅghikaṃ amhākaṃ na pāpuṇātīti gaṇḍiṃ paharitvā bhājāpetvā tesampi vassaggena bhāgaṃ datvā attanāpi paribhuñjiṃsu. Tena tesaṃ bhagavā anāpatti bhikkhave paribhogatthāyāti āha. Tasmā idāni yattha āvāsikā āgantukānaṃ na denti Phalavāre ca sampatte aññesaṃ abhāvaṃ disvā corikāya attanāva khādanti tattha āgantukehi gaṇḍiṃ paharitvā bhājetvā paribhuñjituṃ vaṭṭati. Yattha pana āvāsikā rukkhe rakkhitvā phalavāre sampatte bhājetvā khādanti catūsu paccayesu sammā upanenti anissarā tattha āgantukā. Yepi rukkhā cīvaratthāya niyametvā dinnā tesupi āgantukā anissarā. Eseva nayo sesapaccayatthāya niyametvā dinnesupi. Ye pana tathā aniyamitā āvāsikā ca ne rakkhitvā gopitvā corikāya paribhuñjanti na tesu āvāsikānaṃ katikāya ṭhātabbaṃ. Ye phalaparibhogatthāya dinnā āvāsikā ca ne rakkhitvā gopitvā sammā upanenti tesuyeva tesaṃ katikāya ṭhātabbaṃ. Mahāpaccariyaṃ pana vuttaṃ catunnaṃ paccayānaṃ niyametvā dinnaṃ theyyacittena paribhuñjanto bhaṇḍaṃ agghāpetvā kāretabbo paribhogavasena bhājetvā paribhuñjantassa bhaṇḍadeyyaṃ yaṃ panettha senāsanatthāya niyamitaṃ taṃ paribhogavasena bhājetvā paribhuñjantassa thullaccayañca bhaṇḍadeyyañcāti. Uddissa cīvaratthāya dinnaṃ cīvareyeva upanetabbaṃ. Sace dubbhikkhaṃ hoti bhikkhū piṇḍapātena kilamanti cīvaraṃ pana suladdhaṃ saṅghasuṭṭhutāya apalokanakammaṃ katvā piṇḍapāte upanetuṃ vaṭṭati. Senāsanena gilānapaccayena vā kilamantesu saṅghasuṭṭhutāya apalokanakammaṃ katvā tadatthāyapi upanetuṃ vaṭṭati. Uddissa piṇḍapātatthāya gilānapaccayatthāya ca dinnepi eseva nayo. Uddissa senāsanatthāya dinnaṃ pana garubhaṇḍaṃ hoti taṃ Rakkhitvā gopetvā tadatthameva upanetabbaṃ. Sace pana dubbhikkhaṃ hoti bhikkhū piṇḍapātena na yāpenti ettha rājarogacorabhayādīhi aññattha gacchantānaṃ vihārā palujjanti tālanāḷikerādike vināsenti senāsanapaccayaṃ pana nissāya yāpetuṃ sakkā hoti evarūpe kāle senāsanaṃ vissajjetvāpi senāsanajagganatthāya paribhogo bhagavatā anuññāto. Tasmā ekaṃ vā dve vā varasenāsanāni ṭhapetvā itarāni lāmakakoṭiyā piṇḍapātatthāya vissajjetuṃ vaṭṭati. Mūlavatthucchedaṃ pana katvā na upanetabbaṃ. Yo pana ārāmo catuppaccayatthāya niyametvā dinno tattha apalokanakammaṃ na kātabbaṃ. Yena pana paccayena ūnaṃ tadatthaṃ upanetuṃ vaṭṭati. Ārāmo jaggitabbo vettanaṃ datvāpi jaggāpetuṃ vaṭṭati. Ye pana vettanaṃ labhitvā ārāmeyeva gehaṃ katvā vasantā rakkhanti te ce āgatānaṃ bhikkhūnaṃ nāḷikeraṃ vā tālapakkaṃ vā denti yaṃ tesaṃ saṅghena anuññātaṃ hoti divase divase ettakannāma khādathāti tadeva te dātuṃ labhanti. Tato uttariṃ tesaṃ dadantānampi gahetuṃ na vaṭṭati. Yo panārāmaṃ keṇiyā gahetvā saṅghassa catuppaccayatthāya kappiyabhaṇḍameva deti ayaṃ bahukampi dātuṃ labhati. Cetiyassa padīpatthāya vā khaṇḍaphullapaṭisaṅkharaṇatthāya vā dinno ārāmopi jaggitabbo vettanaṃ datvāpi jaggāpetabbo. Vettanañca panettha cetiyasantakampi saṅghasantakampi dātuṃ vaṭṭati. Etampi ārāmaṃ vettanena tattheva vasitvā rakkhantānañca keṇiyā Gahetvā kappiyabhaṇḍadāyakānañca tattha jātakaphaladānaṃ vuttanayeneva veditabbaṃ. Ambapālakādivatthūsu. Anāpatti bhikkhave gopakassa dāneti ettha kataraṃ gopakassa dānaṃ vaṭṭati kataraṃ na vaṭṭati. Mahāsumatthero tāva āha yaṃ gopakassa paricchinditvā dinnaṃ hoti ettakaṃ divase divase gaṇhāti tadeva vaṭṭati tato uttariṃ na vaṭṭatīti. Mahāpadumatthero panāha kiṃ gopakānaṃ paṇṇaṃ āropetvā nimittasaññaṃ vā katvā dinnaṃ atthi tesaṃ hatthe visaṭṭhakassa ete issarā tasmā yante denti taṃ bahukampi vaṭṭatīti. Kurundaṭṭhakathāyaṃ pana vuttaṃ manussānaṃ ārāmaṃ vā aññaṃ vā phalāphalaṃ dārakā rakkhanti tehi dinnaṃ vaṭṭati āharāpetvā pana na gahetabbaṃ saṅghike cetiyasantake ca keṇiyā gahetvā rakkhantasseva dānaṃ vaṭṭati vettanena rakkhantassa attano bhāgamattaṃ vaṭṭatīti. Mahāpaccariyaṃ yaṃ gihīnaṃ ārāmarakkhakā bhikkhūnaṃ denti etaṃ vaṭṭati bhikkhusaṅghassa ārāmagopakā yaṃ attano bhatiyā khaṇḍetvā denti etaṃ vaṭṭati yopi upaḍḍhārāmaṃ vā kecideva rukkhe vā bhatiṃ labhitvā rakkhati tassāpi attano sampattarakkhatoyeva dātuṃ vaṭṭati keṇiyā gahetvā rakkhantassa pana sabbampi vaṭṭatīti vuttaṃ. Etaṃ pana sabbaṃ byañjanato nānaṃ atthato ekameva tasmā adhippāyaṃ ñatvā gahetabbaṃ.