taṃ vajjayitvā assāpi hoti saṃvaṇṇanā ayanti.
{162} Tena samayena buddho bhagavā vesāliyaṃ viharati mahāvane kūṭāgārasālāyanti vesāliyanti evaṃnāmake itthīliṅgavasena pavattavohāre nagare. Tañhi nagaraṃ tikkhattuṃ pākāraparikkhepavaḍḍhanena visālībhūtattā vesālīti vuccati. Ayamettha saṅkhepo. Vitthāro panassa anupubbīkathaṃ icchantehi paramatthajotikāya khuddakaṭṭhakathāya ratanasuttavaṇṇanāto gahetabbo. Idampi ca nagaraṃ sabbaññutappatteyeva sammāsambuddhe sabbākāravepullattaṃ pattanti veditabbaṃ. Evaṃ gocaragāmaṃ dassetvā nivāsanaṭṭhānamāha mahāvane kūṭāgārasālāyanti. Tattha mahāvanaṃ nāma sayaṃ jātamaropimaṃ saparicchedaṃ mahantaṃ vanaṃ. Kapilavatthusāmantā pana mahāvanaṃ himavantena saha ekābaddhaṃ aparicchedaṃ hutvā mahāsamuddaṃ āhacca ṭhitaṃ. Idaṃ tādisaṃ na hoti saparicchedaṃ mahantaṃ vananti mahāvanaṃ. Kūṭāgārasālā pana mahāvanaṃ nissāya kate ārāme kūṭāgāraṃ anto katvā haṃsavaṭṭakacchadanena katā sabbākārasampannā buddhassa bhagavato Gandhakuṭī veditabbā. Anekapariyāyena asubhakathaṃ kathetīti anekehi kāraṇehi asubhākārasandassanappavattaṃ kāyavicchandanīyakathaṃ katheti. Seyyathīdaṃ. Atthi imasmiṃ kāye kesā lomā .pe. Muttanti. Kiṃ vuttaṃ hoti. Bhikkhave imasmiṃ byāmamatte kalevare sabbādarenapi vicinanto na koci kiñci muttaṃ vā maṇiṃ vā veḍuriyaṃ vā agaruṃ vā candanaṃ vā kukkumaṃ vā kappuraṃ vā vāsacuṇṇādīnaṃ vā anumattampi sucibhāvaṃ passati athakho paramaduggandhaṃ jegucchamassirikadassanaṃ kesalomādinānappakāramasuciṃyeva passati tasmā na ettha chando vā rāgo vā karaṇīyo yepi hi uttamaṅge sirasmiṃ jātā kesā nāma tepi asubhāyeva asucino ca paṭikūlā ca so ca nesaṃ asubhāsucipaṭikūlabhāvo vaṇṇatopi saṇṭhānatopi gandhatopi āsayatopi okāsatopīti pañcahi kāraṇehi veditabbo evaṃ lomādīnanti. Ayamettha saṅkhepo. Vitthāro pana visuddhimagge vuttanayena veditabbo. Iti bhagavā ekamekasmiṃ koṭṭhāse pañcapañcappabhedena anekapariyāyena asubhakathaṃ katheti. Asubhāya vaṇṇaṃ bhāsatīti uddhumātakādivasena asubhamātikaṃ nikkhipitvā padabhājanīyena taṃ vibhajanto vaṇṇento saṃvaṇṇento asubhāya vaṇṇaṃ bhāsati. Asubhabhāvanāya vaṇṇaṃ bhāsatīti yā ayaṃ kesādīsu vā uddhumātakādīsu vā ajjhattabahiddhāvatthūsu vā asubhākāraṃ gahetvā pavattassa cittassa bhāvanā vaḍḍhanā phātikammaṃ tassā