Tassa kukkuccaṃ ahosiyeva. Nadiyā ānubhāvena appamattakampi pāpaṃ pahīnannāma natthi. Ahu vipaṭisāroti tasseva kukkuccassa sabhāvaniyamanatthametaṃ vuttaṃ. Vipaṭisārakukkuccaṃ ahosi na vinayakukkuccanti. Alābhā vata metiādi kukkuccassa pavattiākāradassanatthaṃ vuttaṃ. Tattha alābhā vata meti āyatiṃ dāni mama hitasukhalābhā nāma natthīti anutthunāti. Na vata me lābhāti iminā pana tamevatthaṃ daḷhaṃ karoti. Ayaṃ hettha adhippāyo sacepi koci lābho teti vadeyya taṃ micchā nattheva me lābhāti. Dulladdhaṃ vata meti kusalānubhāvena laddhampi idaṃ manussattaṃ dulladdhaṃ vata me. Na vata me suladdhanti iminā pana tameva atthaṃ daḷhaṃ karoti. Ayaṃ hettha adhippāyo sacepi koci suladdhanteti vadeyya taṃ micchā na vata me suladdhanti. Apuññaṃ pasutanti apuññaṃ upacitaṃ janitaṃ vā. Kasmā iti ce. Yvāhaṃ bhikkhū .pe. Voropesinti. Tassattho yo ahaṃ sīlavante tāya eva sīlavantatāya kalyāṇadhamme uttamadhamme seṭṭhadhamme bhikkhū jīvitā voropesinti. Aññatarā mārakāyikāti nāmavasena apākaṭā ekā bhummadevatā micchādiṭṭhikā mārapakkhikā mārassa anuvattikā evaṃ ayaṃ māradheyyaṃ māravisayaṃ nātikkamissatīti cintetvā sabbābharaṇavibhūsitā hutvā attano ānubhāvaṃ dassayamānā abhijjamāne udake paṭhavītale caṅkamamānā viya āgantvā migalaṇḍikaṃ samaṇakuttakaṃ etadavoca. Sādhu sādhūti sampahaṃsanatthe nipāto. Tasmā evañcettha dvivacanaṃ 1-. Atiṇṇe tāresīti saṃsārato atiṇṇe iminā jīvitāvoropanena tāresi parimocesīti. Ayaṃ kira etissā devatāya bālāya dummedhāya laddhi ye na matā te saṃsārato na muttā ye matā te muttāti. Tasmā saṃsāramocakamilakkhu viya evaṃladdhikā hutvā tampi tattha niyojentī evamāha. Athakho migalaṇḍiko samaṇakuttako tāvabhusaṃ uppannavipaṭisāropi taṃ devatāya ānubhāvaṃ disvā ayaṃ devatā evamāha addhā iminā atthena evameva bhavitabbanti niṭṭhaṃ gantvā lābhā kira metiādīni parikittayanto vihārena vihāraṃ pariveṇena pariveṇaṃ upasaṅkamitvā evaṃ vadeti taṃtaṃ vihārañca pariveṇañca upasaṅkamitvā dvāraṃ vivaritvā anto pavisitvā bhikkhū evaṃ vadeti ko atiṇṇo kantāremīti. Hotiyeva bhayanti maraṇaṃ paṭicca cittutrāso hoti. Chambhitattanti hadayamaṃsaṃ ādiṃ katvā sarīracalanaṃ hoti. Atibhayena thaddhasarīrattantipi eke. Thambhitattaṃ hi chambhitattanti vuccati. Lomahaṃsoti uddhaṃṭhitalomatā. Khīṇāsavā pana sattasuññatāya sudiṭṭhattā maraṇakasattameva na passanti. Tasmā tesaṃ sabbampetaṃ nāhosīti veditabbaṃ. Ekampi dvepi .pe. Saṭṭhiṃpi bhikkhū ekāheneva jīvitā voropesīti evaṃ gaṇanavasena sabbānipi tāni pañca bhikkhusatāni jīvitā voropesi.