Sakkāraṃ labhati. Ayaṃ pana bhikkhu dīpisadisoti vuccati. Yathā hi mahādīpirājā araññe tiṇagahanaṃ vā vanagahanaṃ vā pabbatagahanaṃ vā nissāya niliyitvā vanamahisagokaṇṇasūkarādayo mige gaṇhāti evamevāyaṃ araññādīsu kammaṭṭhānaṃ anuyuñjanto bhikkhu yathākkamena sotāpattisakadāgāmianāgāmiarahattamagge ceva ariyaphalañca gaṇhātīti veditabbo. Tenāhu porāṇā

yathāpi dīpiko nāma niliyitvā gaṇhatī mige

tathevāyaṃ buddhaputto yuttayogo vipassako

araññaṃ pavisitvāna gaṇhāti phalamuttamanti. Tenassa parakkamajavayoggabhūmiṃ araññasenāsanaṃ dassento bhagavā araññagato vātiādimāha. Tattha araññagato vāti araññaṃ nāma nikkhamitvā bahiindakhīlā sabbametaṃ araññanti ca araññikaṃ nāma senāsanaṃ pañcadhanusatikaṃ pacchimanti ca evaṃ vuttalakkhaṇesu araññesu yaṅkiñci pavivekasukhamaraññaṃ gato. Rukkhamūlagato vāti rukkhasamīpaṃ gato. Suññāgāragato vāti suññaṃ vivittokāsaṃ gato. Ettha ca ṭhapetvā araññañca rukkhamūlañca avasesasattavidhasenāsanaṃ gatopi suññāgāragatoti vattuṃ vaṭṭati. Evamassa ututtayānukulaṃ dhātucariyānukulañca ānāpānassatibhāvanānurūpaṃ senāsanaṃ upadisitvā alīnānuddhaccapakkhikaṃ santamiriyāpathaṃ upadisanto nisīdatīti āha. Athassa nisajjāya daḷhabhāvaṃ assāsappassāsānaṃ pavattanasukhataṃ ārammaṇapariggahūpāyañca