Kasmā. Tassa payogena sobbhāditaṭe ṭhitattā.

Upanikkhipanaṃ nāma samīpe nikkhipanaṃ. Tattha yo iminā asinā mato so dhanaṃ vā labhatītiādinā nayena maraṇavaṇṇaṃ vā saṃvaṇṇetvā iminā maraṇatthikā marantu maraṇatthikā mārentūti vā vatvā asiṃ upanikkhipati tassa upanikkhipane dukkaṭaṃ. Maritukāmo vā tena attānaṃ paharatu māretukāmo vā aññaṃ paharatu ubhayathāpi parassa dukkhuppattiyā upanikkhepakassa thullaccayaṃ maraṇe pārājikaṃ. Anuddissa nikkhitte bahūnaṃ maraṇe akusalarāsi pārājikādivatthūsu pārājikādīni. Vipaṭisāre uppanne asiṃ gahitaṭṭhāne ṭhapetvā muccati. Kīṇitvā gahito hoti asissāmikānaṃ asiṃ yesaṃ hatthato mūlaṃ gahitaṃ tesaṃ mūlaṃ datvā muccati. Sace lohapiṇḍaṃ vā phālaṃ vā kuddālaṃ vā gahetvā asi kārāpito hoti yaṃ bhaṇḍaṃ gahetvā kārito tadeva katvā muccati. Sace kuddālaṃ gahetvā kāritaṃ vināsetvā phālaṃ karoti phālena pahāraṃ labhitvā marantesupi pāṇātipātā na muccati. Sace pana lohaṃ samuṭṭhāpetvā upanikkhipanatthameva kārito hoti ārena ghaṃsitvā cuṇṇavicuṇṇaṃ katvā vippakiṇṇe muccati. Sacepi saṃvaṇṇanāpotthako viya bahūhi ekajjhāsayehi kato hoti potthake vuttanayeneva kammabandhavinicchayo veditabbo. Esa nayo sattibhindīsu. Sūlalaguḷesu pāsayaṭṭhisadiso vinicuchayo. Tathā pāsāṇe. Satthe asisadisova. Visaṃ vāti Visaṃ upanikkhipantassa vatthuvasena uddissānuddissānurūpato pārājikādivatthūsu pārājikādīni veditabbāni. Kīṇitvā ṭhapite purimanayena paṭipākatikaṃ katvā muccati. Sayaṃ bhesajjehi yojite avisaṃ katvā muccati. Rajjuyā pāsarajjusadisova vinicchayo.

Bhesajje. Yo bhikkhu veribhikkhussa pajjarake vā visabhāgaroge vā uppanne asappāyānipi sappiādīni sappāyānīti maraṇādhippāyo deti aññaṃ vā kiñci kandamūlaphalaṃ. Tassa evaṃ bhesajjadāne dukkaṭaṃ parassa dukkhuppattiyaṃ maraṇe ca thullaccayapārājikāni ānantariyavatthumhi ānantariyanti veditabbaṃ.