Dutiyavatthusmiṃ na ca bhikkhave apaṭivekkhitvāti ettha. Kīdisaṃ āsanaṃ paṭivekkhitabbaṃ kīdisaṃ na paṭivekkhitabbaṃ. Yaṃ suddhaṃ āsanameva hoti apaccattharaṇakaṃ yañca āgantvā ṭhitānaṃ passataṃyeva attharīyati taṃ na paccavekkhitabbaṃ nisīdituṃ vaṭṭati. Yampi manussā sayaṃ hatthena akkamitvā idha bhante nisīdathāti denti tasmimpi vaṭṭati. Sacepi paṭhamameva āgantvā nisinnā pacchā uddhaṃ vā adho vā saṅkamanti paṭivekkhaṇakiccaṃ natthi. Yampi tanukena vatthena yathā talaṃ dissati evaṃ paṭicchannaṃ hoti tasmimpi paṭivekkhaṇakiccaṃ natthi. Yampana paṭikacceva pāvārakojavakādīhi atthataṃ hoti taṃ hatthena parāmasitvā sallakkhetvā nisīditabbaṃ. Mahāpaccariyaṃ pana ghanasāṭakenāpi atthate yasmiṃ valī na paññāyati taṃ na paṭivekkhitabbanti vuttaṃ.

Musalavatthusmiṃ. Asañciccoti avadhakacetano. Viraddhappayogo hi so tenāha asañcicco ahanti. Udukkhalavatthu uttānatthameva. Vuḍḍhapabbajitavatthūsu paṭhamavatthusmiṃ. Bhikkhusaṅghassa palibuddhaṃ mā akāsīti paṇāmesi. Dutiyavatthusmiṃ. Saṅghamajjhepi Gaṇamajjhepi mahallakattherassa puttoti vuccamāno tena vacanena aṭṭiyamāno maratu ayanti paṇāmesi. Tatiyavatthusmiṃ. Tassa dukkhuppādanena thullaccayaṃ. {181} Tato parāni tīṇi vatthūni uttānatthāneva.

Visagatapiṇḍapātavatthusmiṃ. Sārāṇīyadhammapūrako so bhikkhu aggapiṇḍaṃ sabrahmacārīnaṃ datvāva bhuñjati. Tena vuttaṃ aggakārikaṃ adāsīti. Aggakārikanti aggakiriyaṃ paṭhamaladdhapiṇḍapātaṃ aggaggaṃ vā paṇītappaṇītaṃ piṇḍapātanti attho. Yā pana tassa dānasaṅkhātā aggakiriyā sā na sakkā dātuṃ. Piṇḍapātampi hi so therāsanato paṭṭhāya adāsi. Te bhikkhūti te therāsanato paṭṭhāya paribhuttapiṇḍapātā bhikkhū. Te kira sabbepi kālamakaṃsu. Sesamettha uttānameva. Asaddhesu pana micchādiṭṭhikakulesu sakkaccaṃ paṇītabhojanaṃ labhitvā anupaparikkhitvā neva attanā paribhuñjitabbaṃ na paresaṃ dātabbaṃ. Yaṃpi ābhidosikaṃ bhattaṃ vā khajjakaṃ vā tato labhati tampi na paribhuñjitabbaṃ. Apihitavatthumpi hi sappavicchikādīhi adhisayitaṃ chaḍḍanīyadhammaṃ tāni kulāni denti. Gandhahaliddādimakkhitopi tato piṇḍapāto na gahetabbo. Sarīre rogaṭṭhānāni puñchitvā ṭhapitabhattampi hi tāni dātabbaṃ maññantīti. Vīmaṃsanavatthusmiṃ. Vīmaṃsamāno dve vīmaṃsati sakkoti nukho idaṃ māretuṃ noti visaṃ vā vīmaṃsati mareyya nukho ayaṃ imaṃ visaṃ khāditvā noti puggalaṃ vā. Ubhayathāpi vīmaṃsādhippāyena dinne maratu vā mā vā thullaccayaṃ. Imaṃ visaṃ etaṃ māretūti Vā imaṃ visaṃ khāditvā ayaṃ maratūti vā evaṃ dinne pana sace marati pārājikaṃ no ce thullaccayaṃ.