Silāvatthusmiṃ. Davāyāti davena hassena khiḍḍāyāti attho. Silāti pāsāṇo. Na kevalañca pāsāṇo aññampi yaṅkiñci dārukhaṇḍaṃ vā iṭṭhakakhaṇḍaṃ vā hatthena vā yantena vā pavijjhituṃ na vaṭṭati. Cetiyādīnaṃ atthāya pāsāṇādayo hasantā hasantā pavaṭṭentipi ukkhipantipi kammasamayoti vaṭṭati. Aññampi īdisaṃ navakammaṃ vā karontā bhaṇḍakaṃ vā dhovantā rukkhaṃ vā dhovanadaṇḍakaṃ vā ukkhipitvā pavijjhanti vaṭṭati. Bhattavisaggakālādīsu kāke vā soṇe vā kaṭṭhaṃ vā kathalaṃ vā khipitvā palāpeti vaṭṭati.

{184} Sedanādivatthūni sabbāneva uttānatthāni. Ettha ca ahaṃ kukkuccakoti gilānūpaṭṭhānaṃ na kātabbaṃ. Hitakāmatāya sabbaṃ gilānassa balābalañca ruciñca sappāyañca upalakkhetvā kātabbaṃ.

{185} Jāragabbhinīvatthusmiṃ. Pavuṭṭhapatikāti pavāsaṅgatapatikā. Gabbhapātananti yena paribhuttena gabbho patati tādisaṃ bhesajjaṃ. Dvipajāpatikavatthūni uttānatthāneva. Gabbhamandanavatthusmiṃ. Madditvā pātehīti vutte aññena maddāpetvā pāteti visaṅketaṃ. Maddāpetvā pātāpehīti vuttepi sayaṃ madditvā pāteti visaṅketameva. Manussaviggahe pariyāyo nāma natthi tasmā gabbho nāma maddito patatīti vutte sā sayaṃ vā maddatu aññena vā maddāpetvā pātetu visaṅketo natthi pārājikameva. Tāpanavatthusmimpi eseva nayo. Vañjhitthīvatthusmiṃ vañjhitthī nāma yā gabbhaṃ na gaṇhāti. Gabbhaagaṇhanakaitthī nāma natthi yassā pana gahitopi gabbho na saṇṭhāti taṃ sandhāyetaṃ vuttaṃ. Utusamaye kira sabbitthiyo gabbhaṃ gaṇhanti yā panāyaṃ vañjhāti vuccati tassā kucchiyaṃ nibbattasattānaṃ akusalavipāko sampāpuṇāti. Te parittakusalavipākena gahitapaṭisandhikā Akusalavipākena abhibhūtā vinassanti. Abhinavapaṭisandhiyaṃyeva hi kammānubhāvena dvīhākārehi gabbho na saṇṭhāti vātena vā pāṇakehi vā. Vāto sosetvā antaradhāpeti. Pāṇakā khāditvā. Tassa pana vātassa pāṇakānaṃ vā paṭighātāya bhesajje kate gabbho saṇṭhaheyya. So bhikkhu taṃ akatvā aññaṃ kharaṃ bhesajjaṃ adāsi. Tena sā kālamakāsi. Bhagavā bhesajjassa katattā dukkaṭaṃ paññāpesi. Dutiyavatthusmimpi eseva nayo.