Aññesaṃ na dātabbaṃ. Etesaṃ puttaparamparāya pana yāva sattamo kulaparivaṭṭo tāva cattāro paccaye āharāpentassa akataviññatti vā bhesajjaṃ karontassa vejjakammaṃ vā kuladūsakāpatti vā na hoti. Sace bhātujāyā bhaginīsāmiko vā gilānā honti ñātakā ce tesampi vaṭṭati. Añātakā ce bhātu ca bhaginiyā ca katvā dātabbaṃ tumhākaṃ jagganaṭṭhāne dethāti. Athavā tesaṃ puttānaṃ katvā dātabbaṃ tumhākaṃ mātāpitūnaṃ dethāti. Etena upāyena sabbapadesu vinicchayo veditabbo. Tesaṃ atthāya sāmaṇerehi araññato bhesajjaṃ āharāpentena ñātisāmaṇerehi vā āharāpetabbaṃ attano atthāya vā āharāpetvā dātabbaṃ. Tehipi upajjhāyassa āharāmāti vattasīsena āharitabbaṃ. Upajjhāyassa mātāpitaro gilānā vihāraṃ āgacchanti. Upajjhāyo ca disāpakkanto hoti. Saddhivihārikena upajjhāyassa santakaṃ bhesajjaṃ dātabbaṃ. No ce atthi attano bhesajjaṃ upajjhāyassa pariccajitvā dātabbaṃ. Attanopi asante vuttanayena pariyesitvā upajjhāyassa santakaṃ katvā dātabbaṃ. Upajjhāyenapi saddhivihārikassa mātāpitūsu evameva paṭipajjitabbaṃ. Esa nayo ācariyantevāsikesu. Aññopi yo āgantuko vā coro vā yuddhaparājito vā issaro vā ñātakehi pariccatto gamiyamanusso vā gilāno hutvā vihāraṃ pavisati. Sabbesaṃ apaccāsiṃsantena bhesajjaṃ kātabbaṃ. Saddhaṃ kulaṃ Hoti catūhi paccayehi upaṭṭhāyakaṃ bhikkhusaṅghassa mātāpituṭṭhāniyaṃ. Tatra ce koci gilāno hoti tassatthāya vissāsena bhesajjaṃ katvā bhante dethāti vadanti neva dātabbaṃ na kātabbaṃ. Atha pana kappiyaṃ ñatvā evaṃ pucchanti bhante asukassa nāma rogassa kiṃ bhesajjaṃ karontīti idañcīdañca gahetvā karontīti vattuṃ vaṭṭati. Bhante mayhaṃ mātā gilānā bhesajjaṃ tāva ācikkhathāti evaṃ pucchitena pana na ācikkhitabbaṃ. Aññamaññaṃ pana kathā kātabbā āvuso asukassa nāma bhikkhuno imasmiṃ roge kiṃ bhesajjaṃ kariṃsūti idañcīdañca bhanteti. Taṃ sutvā itaro mātu bhesajjaṃ karoti vaṭṭati. Mahāpadumattheropi kira vasabharañño deviyā roge uppanne ekāya itthiyā āgantvā pucchito na jānāmīti avatvā evameva bhikkhūhi saddhiṃ samullapesi. Taṃ sutvā tassā bhesajjamakaṃsu. Vūpasante ca roge ticīvarena tīhi ca kahāpaṇasatehi saddhiṃ bhesajjacaṅkoṭakaṃ pūretvā āharitvā therassa pādamūle ṭhapetvā bhante pupphapūjaṃ karothāti āhaṃsu. Thero ācariyabhāgo nāma ayanti kappiyavasena gāhāpetvā pupphapūjaṃ akāsi. Evaṃ tāva bhesajje paṭipajjitabbaṃ.