Paritte pana gilānassa parittaṃ karotha bhanteti vuttena na kātabbaṃ. Bhaṇathāti vutte pana kātabbaṃ. Sacepissa hoti manussā nāma na jānanti akarīyamāne vipaṭisārino bhavissantīti kātabbaṃ. Parittodakaṃ parittasuttaṃ katvā dethāti vuttena pana Tesaṃyeva udakaṃ hatthena cāletvā suttaṃ parimajjetvā dātabbaṃ. Sace vihārato udakaṃ attano santakaṃ vā suttaṃ deti dukkaṭaṃ. Manussā udakañca suttañca gahetvā nisīditvā parittaṃ bhaṇathāti vadanti kātabbaṃ. No ce jānanti ācikkhitabbaṃ. Bhikkhūnaṃ nisinnānaṃ pādesu udakaṃ ākīritvā suttañca ṭhapetvā gacchanti parittaṃ karotha parittaṃ bhaṇathāti na pādā apanetabbā. Manussā hi vipaṭisārino honti. Antogāme gilānassatthāya vihāraṃ pesenti parittaṃ bhaṇantūti bhaṇitabbaṃ. Antogāme rājagehādīsu roge vā upaddave vā uppanne pakkosāpetvā bhaṇāpenti. Āṭānāṭiyasuttādīni bhaṇitabbāni. Āgantvā gilānassa sikkhāpadāni dentu dhammaṃ kathentu rājantepure vā amaccagehe vā āgantvā sikkhāpadāni dentu dhammaṃ kathentūti pesitepi gantvā sikkhāpadāni dātabbāni dhammo kathetabbo. Matānaṃ parivāratthaṃ āgacchantūti pakkosanti na gantabbaṃ. Sivaṭṭhikadassane asubhadassane ca maraṇassatiṃ paṭilabhissāmāti kammaṭṭhānasīsena gantuṃ vaṭṭati. Evaṃ paritte paṭipajjitabbaṃ.

Piṇḍapāte pana. Anāmaṭṭhapiṇḍapāto kassa dātabbo kassa na dātabbo. Mātāpitūnaṃ tāva dātabbo. Sace pana kahāpaṇagghanako hoti saddhādeyyavinipātanaṃ natthi. Mātāpituupaṭṭhākānaṃ veyyāvaccakarassa paṇḍupalāsassāti etesaṃpi dātabbo.

Tattha paṇḍupalāsassa thālake nikkhipitvā dātuṃ vaṭṭati. Taṃ ṭhapetvā aññesaṃ āgārikānaṃ mātāpitūnaṃpi na vaṭṭati. Pabbajitaparibhogo hi āgārikānaṃ cetiyaṭṭhāniyo. Apica anāmaṭṭhapiṇḍapāto nāmesa sampattassa dāmarikacorassāpi issarassāpi dātabbo. Kasmā. Te hi adīyamānepi na dentīti āmasitvā dīyamānepi ucchiṭṭhakaṃ dentīti kujjhanti. Kuddhā jīvitā voropenti sāsanassāpi antarāyaṃ karonti. Rajjaṃ paṭṭhayamānassa vicarato coranāgassa vatthu cettha kathetabbaṃ. Evaṃ piṇḍapāte paṭipajjitabbaṃ.