Paṭisanthāre pana. Paṭisanthāro kassa kātabbo kassa na kātabbo. Paṭisanthāro nāma vihāraṃ sampattassa yassa kassaci āgantukassa vā daliddassa vā corassa vā issarassa vā kātabboyeva. Kathaṃ. Āgantukaṃ tāva khīṇaparibbayaṃ vihārasampattaṃ disvā pānīyaṃ pivāti dātabbaṃ. Pādamakkhanatelaṃ dātabbaṃ. Kāle āgatassa yāgubhattaṃ. Vikāle āgatassa sace taṇḍulā atthi taṇḍulā dātabbā. Avelāya sampattosi gacchāhīti na vattabbo. Sayanaṭṭhānaṃ dātabbaṃ. Sabbaṃ apaccāsiṃsanteneva kātabbaṃ. Manussā nāma catuppaccayadāyakā evaṃ saṅgahe karīyamāne punappunaṃ pasīditvā upakāraṃ karissantīti cittaṃ na uppādetabbaṃ. Corānaṃ pana saṅghikampi dātabbaṃ. Paṭisanthārānisaṃsadīpanatthañca coranāgavatthu bhātarā saddhiṃ jambūdīpagatassa Mahānāgarañño vatthu piturājassa rajje catunnaṃ amaccānaṃ vatthu abhayacoravatthūtievamādīni bahūni vatthūni mahāaṭṭhakathāyaṃ vitthārato vuttāni.
Tatrāyaṃ ekavatthudīpanā. Sīhaladīpe kira abhayo nāma coro pañcasataparivāro ekasmiṃ ṭhāne khandhāvāraṃ bandhitvā samantā tiyojanaṃ ubbāsetvā vasati. Anurādhapuravāsino kaḷambanadiṃ na uttaranti. Cetiyagirimagge janasañcāro upacchinno. Athekadivasaṃ coro cetiyagiriṃ vilumpissāmīti agamāsi. Ārāmikā disvā dīghabhāṇakaabhayattherassa ārocesuṃ. Thero sappiphāṇitādīni atthīti pucchi. Atthi bhanteti. Corānaṃ detha taṇḍulā atthīti. Atthi bhante saṅghassatthāya āhaṭā taṇḍulā ca pakkasākañca goraso cāti. Bhattaṃ sampādetvā corānaṃ dethāti. Ārāmikā tathā kariṃsu. Corā bhattaṃ bhuñjitvā kenāyaṃ paṭisanthāro katoti pucchiṃsu. Amhākaṃ ayyena abhayattherenāti. Corā therassa santikaṃ gantvā vanditvā āhaṃsu mayaṃ saṅghassa ca cetiyassa ca santakaṃ acchinditvā gahessāmāti āgatā tumhākaṃ pana iminā paṭisanthārenamhā pasannā ajjato paṭṭhāya vihāre dhammikā rakkhā amhākaṃ āyattā hotu nāgarā āgantvā dānaṃ dentu cetiyaṃ vandantūti. Tato paṭṭhāya ca nāgare dānaṃ dātuṃ āgacchante nadītīreyeva paccuggantvā rakkhantā vihāraṃ nenti vihārepi dānaṃ dentānaṃ rakkhaṃ katvā tiṭṭhanti. Tepi bhikkhūnaṃ bhuttāvasesaṃ corānaṃ denti. Gamanakālepi te corā Nadītīraṃ pāpetvā nivattanti. Athekadivasaṃ bhikkhusaṅghe khīyanakathā uppannā thero issaravatāya saṅghassa santakaṃ corānaṃ adāsīti. Thero sannipātaṃ kārāpetvā āha corā saṅghassa pakativaṭṭañca cetiyasantakañca acchinditvā gaṇhissāmāti āgamiṃsu atha nesaṃ mayā evaṃ na harissantīti ettako nāma paṭisanthāro kato taṃ sabbampi ekato sampiṇḍetvā agghāpetha tena kāraṇena aviluttaṃ bhaṇḍaṃ ekato sampiṇḍetvā agghāpethāti. Tato sabbampi therena dinnakaṃ cetiyaghare ekaṃ varapotthakacittattharakaṃ na agghi. Tato āhaṃsu therena katapaṭisanthāro sukato codetuṃ vā sāretuṃ vā na labhati gīvā vā avahāro vā natthīti. Evaṃ mahānisaṃso paṭisanthāroti sallakkhetvā kattabbo paṇḍitena bhikkhunāti.