{187} Aṅgulipaṭodavatthusmiṃ. Uttasantoti kilanto. Anassāsakoti nirassāso. Imasmiñca pana vatthusmiṃ yāya āpattiyā bhavitabbaṃ sā khuddakesu niddiṭṭhāti idha na vuttā.

Tadanantare vatthusmiṃ. Ottharitvāti akkamitvā. So kira tehi ākaḍḍhiyamāno patito. Eko tassa udaraṃ āruhitvā nisīdi. Sesāpi paṇṇarasa janā paṭhaviyaṃ ajjhottharitvā adūhalapāsāṇā viya migaṃ māresuṃ. Yasmā pana te kammādhippāyā na maraṇādhippāyā tasmā pārājikaṃ na vuttaṃ.

Bhūtavejjakavatthusmiṃ. Yakkhaṃ māresīti bhūtavejjakapāṭhakā yakkhagahitakaṃ mocetukāmā yakkhaṃ āvāhetvā muñcāti vadanti. No ce muñcati piṭṭhena vā mattikāya vā rūpaṃ katvā hatthapādādīni chindanti. Yaṃyaṃ tassa chijjati taṃtaṃ yakkhassa chinnameva hoti. Sīse chinne yakkhopi marati. Evaṃ sopi māresi. Tasmā thullaccayaṃ vuttaṃ. Na kevalañca yakkhameva. Yopi hi sakkaṃ devarājānaṃ māreyaya sopi thullaccayameva āpajjati.

Vāḷayakkhavatthusmiṃ. Vāḷayakkhavihāranti yasmiṃ vihāre vāḷo caṇḍo yakkho vasati taṃ vihāraṃ. Yo hi evarūpaṃ vihāraṃ ajānanto kevalaṃ vasanatthāya peseti anāpatti. Yo maraṇādhippāyo peseti so itarassa maraṇe pārājikaṃ amaraṇe thullaccayaṃ āpajjati. Yathā ca vāḷayakkhavihāraṃ evaṃ yattha vāḷasīhabyagghādimigā vā ajagarakaṇhasappādayo dīghajātikā vā vasanti taṃ vāḷavihāraṃ pesentassāpi āpattānāpattibhedo veditabbo. Ayaṃ pālimuttakanayo. Yathā ca bhikkhuṃ vāḷayakkhavihāraṃ pesentassa evaṃ vāḷayakkhampi bhikkhusantikaṃ pesentassa āpattānāpattibhedo veditabbo. Eseva nayo vāḷakantārādīsu vatthūsu. Kevalaṃ hettha yasmiṃ kantāre vāḷamigā vā dīghajātikā vā atthi so vāḷakantāro yasmiṃ corā atthi so corakantāroti evaṃ padatthamattameva nāmaṃ. Manussaviggahapārājikañca nāmetaṃ saṇhaṃ pariyāyakathāya na muccati. Tasmā yo vadeyya asukasmiṃ nāma okāse coro nisinno yo tassa sīsaṃ chinditvā āharati so rājato sakkāravisesaṃ labhatīti tassa ce vacanaṃ Sutvā koci naṃ gantvā māreti ayaṃ pārājiko hotīti.