{190} Dāyālimpanavatthūsu. Dāyaṃ limpesunti vane aggiṃ adaṃsu. Ettha pana uddissānuddissavasena pārājikānantariyathullaccayapācittiyavatthūnaṃ anurūpato pārājikādīni akusalarāsibhāvo ca pubbe vuttanayeneva veditabbo. Allatiṇavanappatayo dayhantūti ālimpentassa ca pācittiyaṃ dabbūpakaraṇāni vinassantūti ālimpentassa dukkaṭaṃ khiḍḍādhippāyenāpi dukkaṭanti saṅkhepaṭṭhakathāyaṃ vuttaṃ. Yaṅkiñci allasukkhaṃ saindriyānindriyaṃ dayhatūti ālimpentassa vatthuvasena pārājikathullaccayapācittiyadukkaṭāni veditabbāni. Paṭaggidānaṃ pana parittakaraṇañca bhagavatā anuññātaṃ. Tasmā araññe vanakammikehi dinnaṃ sayaṃ vā uṭṭhitaṃ aggiṃ āgacchantaṃ disvā Tiṇakuṭiyo mā vinassantūti tassa aggino paṭiaggiṃ dātuṃ vaṭṭati yena saddhiṃ āgacchanto aggi ekato hutvā nirupādāno nibbāti. Parittampi kātuṃ vaṭṭati tiṇakuṭikānaṃ samantā bhūmitacchanaṃ parikkhākhananaṃ vā yathā āgato aggi upādānaṃ alabhitvā nibbāti. Etañca sabbaṃ uṭṭhiteyeva aggismiṃ kātuṃ vaṭṭati. Anuṭṭhite anupasampannehi kappiyavohārena kāretabbaṃ. Udakena ca nibbāpentehi appāṇakameva udakaṃ āsiñcitabbaṃ.

{191} Āghātanavatthusmiṃ. Yathā ekappahāravacane evaṃ dvīhi pahārehītiādivacanesupi pārājikaṃ veditabbaṃ. Dvīhīti vutte ca ekena pahārena māritepi khettameva otiṇṇattā pārājikaṃ. Tīhi mārite pana visaṅketaṃ. Iti yathāparicchede vā paricchedabbhantare vā avisaṅketaṃ. Paricchedātikkame pana sabbattha visaṅketaṃ hoti āṇāpako muccati vadhakasseva doso. Yathā ca pahāresu evaṃ purisesupi eko ekaṃ māretūti vutte ekeneva mārite pārājikaṃ dvīhi mārite visaṅketaṃ dve mārentūti vutte ekena vā dvīhi vā mārite pārājikaṃ tīhi mārite visaṅketanti veditabbaṃ. Eko saṅgāme vegena dhāvato purisassa asinā sīsaṃ chindi asīsakabandhaṃ dhāvati tamañño paharitvā pātesi kassa pārājikanti vutte upaḍḍhattherā gamanūpacchedakassāti āhaṃsu. Ābhidhammikagodattatthero sīsacchedakassāti. Evarūpānipi vatthūni imassa vatthussa atthadīpane vattabbānīti.